गुरु पौर्णिमा… एक असा दिवस जेव्हा नात्यांचे अर्थ नव्याने उमगतात, श्रद्धा आणि आभाराची भावना मनाच्या गाभ्यापर्यंत पोहोचते. ही केवळ एक पौर्णिमा नाही, तर आपल्या आयुष्यात मार्गदर्शक ठरलेल्या गुरुजनांना, आईवडिलांना, शिक्षण देणाऱ्या प्रत्येक व्यक्तीला नतमस्तक होण्याची एक सुंदर संधी आहे. यंदा 10 जुलै रोजी म्हणजेच आज गुरु पौर्णिमेचा उत्सव साजरा होत आहे आणि विशेष म्हणजे तो गुरुवारीच आला आहे, या दिवशी बृहस्पति, ज्ञानाचे आणि समृद्धीचे देव विशेष पूजनीय मानले जातात.
या खास दिवशी, आपल्या जीवनातील अडचणी दूर व्हाव्यात, दारिद्र्य हटावं आणि सुख-समृद्धी नांदावी यासाठी काही गोष्टी दान केल्या जातात. या दानाला केवळ धार्मिक महत्त्व नाही, तर त्यामागे एक भावनिक आणि आध्यात्मिक भावनाही असते, ती भावना म्हणजे कृतज्ञता.
भगवद्गीतेचं दान
गुरु पौर्णिमेच्या दिवशी भगवद्गीतेचं दान करणं फारच शुभ मानलं जातं. गीता केवळ एक ग्रंथ नसून, ती जीवनाचं मार्गदर्शन देणारी प्रकाशवाट आहे. एखाद्याला गीता भेट दिल्यास, ते त्याच्या जीवनातील अंधार दूर करून समज आणि संयम वाढवण्यास मदत करते, असं मानलं जातं. यामुळे आपण केवळ ज्ञानच नव्हे, तर एक सकारात्मक ऊर्जा पेरत असतो.
सोनं, चांदी किंवा धान्य
या दिवशी सोनं, चांदी किंवा धान्य याचं दान करावं, असं शास्त्र सांगतं. सोनं आणि चांदी हे वैभवाचं प्रतीक असलं, तरी त्यांचं दान केल्याने मनातली आसक्ती कमी होते आणि घरात शांतता नांदते. पण जर हे शक्य नसेल, तर पितळेच्या वस्तू किंवा धान्य दान करणंही तितकंच पुण्यदायी मानलं जातं. हे शुद्धतेचं आणि गोंधळ दूर करणाऱ्या ऊर्जेचं प्रतीक मानलं जातं, त्यामुळे याचा उपयोग आर्थिक स्थैर्यासाठी होतो.
गूळ आणि हरभरा
देवी लक्ष्मीचा आशीर्वाद हवा असेल, तर पिवळ्या कापडात गूळ आणि हरभरा बांधून मंदिरात जाऊन ते पुजाऱ्याला दान करणं हा एक प्राचीन आणि प्रभावी उपाय मानला जातो. गूळ म्हणजे गोडवा, हरभरा म्हणजे आरोग्य आणि पिवळं कापड हे बृहस्पतीशी जोडलेलं शुभतेचं प्रतीक. या तीनही गोष्टी एकत्र करून दिल्या, तर त्या दानामागे मनापासून केलेली प्रार्थना लपलेली असते.
तूप
कुटुंबात एखादा सदस्य वारंवार आजारी पडत असेल, तर गुरुपौर्णिमेच्या दिवशी तूप दान करणं फारच लाभदायक मानलं जातं. तुपाचा दिवा हा केवळ प्रकाश देत नाही, तर नकारात्मक ऊर्जा दूर करण्याचंही काम करतो. विशेषतः तुळशी जवळ पाच तुपाचे दिवे लावल्याने घराच्या ऊर्जेचा स्तर बदलतो, असंही मानलं जातं.
पिवळ्या कपड्यांचं दान
पिवळ्या कपड्यांचं दान करणं म्हणजे आपल्या मनातील श्रद्धेचं प्रतीक असतं. पिवळा रंग बृहस्पतीचा आणि ज्ञानाचा प्रतिनिधी आहे. गुरु किंवा वडीलधाऱ्यांना पिवळे कपडे भेट देणं शुभ मानलं जाते.
