विमानात बसणे म्हणजे आकाशात उड्डाण करण्याचा रोमांच, पण या प्रवासात थोडा निष्काळजीपणा किंवा अज्ञानदेखील गंभीर अपघाताला निमंत्रण देऊ शकतो. विमान हे एका अत्यंत नियंत्रित आणि सुरक्षेच्या कसोटीवर उभे असलेले वाहन आहे, ज्यामध्ये प्रत्येक गोष्ट नियमानुसार असावी लागते. त्यामुळेच, विमानात काय नेता येईल आणि काय नाही, याबद्दल प्रवाशांनी पूर्ण जागरूक असणे आवश्यक आहे.
गॅझेट्स
आजकाल बहुतांश प्रवासी लॅपटॉप, स्मार्टफोन, पॉवर बँकसारख्या गॅझेट्ससह प्रवास करतात. या गॅझेट्समध्ये लिथियम-आयन बॅटरी असते. ही बॅटरी जर चुकीच्या तापमानात किंवा दाबाखाली गेली, तर ती स्फोट होण्याची शक्यता असते. त्यामुळे अशा बॅटरी असलेली उपकरणे चेक-इन बॅगेजमध्ये ठेवण्यास मनाई असते. ती केवळ हँड बॅगेजमध्येच नेता येतात, आणि त्यासाठीही ठराविक मर्यादा पाळाव्या लागतात. विशेषतः, 27000 mAh पेक्षा जास्त क्षमतेची पॉवर बँक अनेक एअरलाइन्समध्ये पूर्णपणे बॅन असते.
ज्वलनशील पदार्थ
तसेच, ज्वलनशील पदार्थ जसे की हेअर स्प्रे, परफ्यूम, डिओड्रंट यांना विमानात नेण्यात अनेक मर्यादा असतात. कारण हवेतील दाबात बदल झाल्यास या द्रवांची रासायनिक प्रतिक्रिया होऊन आग लागण्याचा धोका निर्माण होतो. त्यामुळे अशी उत्पादने अगदी मर्यादित प्रमाणातच आणि विशेष पॅकिंगमध्ये नेण्याची मुभा दिली जाते.
विमान प्रवासात आणखी एक अत्यंत महत्त्वाची बाब म्हणजे शस्त्रे किंवा धारदार वस्तू. तुम्ही कितीही छोटा चाकू किंवा कात्री नेत असाल, तरी ती वस्तू विमानाच्या केबिनमध्ये नेण्यावर थेट बंदी घालण्यात आलेली आहे. या सर्व वस्तू सुरक्षेच्या दृष्टीने धोकादायक मानल्या जातात आणि त्यामुळे सिक्युरिटी चेकदरम्यान त्यांचा ताबा घेतला जातो.
…तर ग्राहकसेवेशी संपर्क करा
प्रवाशांच्या सुरक्षिततेसाठी हवाई सुरक्षेचे नियम अतिशय कडक असतात आणि ते पाळणे केवळ वैयक्तिक सुरक्षा नव्हे, तर शेकडो प्रवाशांच्या प्राणांशी निगडित असते. विमानातील एखादा लहानसा चुकीचा पदार्थही मोठा धोका निर्माण करू शकतो. त्यामुळे, विमानात प्रवास करण्यापूर्वी तुमच्या सामानाची एकदा व्यवस्थित तपासणी करा. एखादी वस्तू नेण्यात शंका असेल, तर विमान कंपनीच्या अधिकृत मार्गदर्शक तत्त्वांचा अभ्यास करा किंवा थेट त्यांच्या ग्राहकसेवेशी संपर्क करा. या छोट्याशा खबरदारीमुळे केवळ तुमचाच नव्हे, तर संपूर्ण विमानातील प्रत्येक प्रवाशाचा जीव सुरक्षित राहतो.