उन्हाळ्यात अंगाची लाही लाही होते, घामाच्या धारा सुरू होतात आणि अशा वेळेस आपल्याला काहीतरी थंड, ताजं आणि शरीराला ऊर्जा देणारं हवंच असतं. अनेकदा आपण कोल्ड ड्रिंक्स किंवा आइस्क्रीमकडे वळतो, पण ही सवय आपल्या आरोग्याला फारशी पोषक ठरत नाही. अशावेळी एक छोटा पण अत्यंत उपयुक्त उपाय आपल्या स्वयंपाकघरातच असतो, तो म्हणजे चिया बिया. दिसायला बारीक आणि साधे वाटणारे हे बीज खरंतर उन्हाळ्यासाठी एक सुपरफूडच आहे.
चिया बियामधील पोषक घटक
चिया बिया ओमेगा-3 फॅटी अ‍ॅसिड, फायबर, प्रोटीन आणि अँटीऑक्सिडंट्सने भरलेले असतात. या छोट्या बियांमध्ये इतकं सामर्थ्य आहे की त्या तुमच्या शरीराला उष्णतेपासून वाचवतात, त्वचेला आतून पोषण देतात आणि वजन कमी करण्यास मदत करतात. विशेषतः उन्हाळ्यात त्यांचा नियमित आहारात समावेश केल्यास शरीराचं तापमान संतुलित राहतं आणि डिहायड्रेशनपासूनही संरक्षण मिळतं.
हे बीज खाण्याची योग्य पद्धत म्हणजे ते पाण्यात भिजवून खाणं. चिया बिया पाण्यात भिजल्यावर त्या जेलसारख्या होतात. हा बदल फक्त त्यांच्या पोतासाठी नाही, तर पचनासाठी आणि थंडावा मिळवण्यासाठीही फायदेशीर ठरतो. भिजवलेले चिया बिया तुम्ही तुमच्या स्मूदी, थंड दह्याच्या वाटीत, सॅलड किंवा फळांच्या रसात सहज मिसळू शकता. चवमध्ये मोठा फरक न आणता ते पोषणमूल्य मात्र जबरदस्त वाढवतात.
चिया बियांचे फायदे
चिया बियांचं आणखी एक वैशिष्ट्य म्हणजे ते त्वचेसाठीही वरदानच ठरतात. उन्हाळ्यात चेहऱ्यावर कोरडेपणा आणि मुरुमांचं प्रमाण वाढतं, पण चिया बियांतील अँटीऑक्सिडंट्स आणि ओमेगा-3 फॅटी अ‍ॅसिड हे त्वचेला आतून हायड्रेट करतात आणि नैसर्गिक चमक टिकवून ठेवतात.
वजन कमी करण्याचा विचार करत असाल, तर चिया बिया तुमच्यासाठी परफेक्ट डाएट ठरू शकतात. त्यातील फायबर पचनक्रियेस चालना देतं आणि पोट भरल्यासारखं वाटतं. त्यामुळे वजन आटोक्यात राहायला मदत होते.
या बियांमधून तुम्ही सहजपणे एक हेल्दी आणि एनर्जेटिक ड्रिंकही तयार करू शकता. चिया बिया थोडे पाण्यात, लिंबाच्या रसात आणि मधात मिसळा हे थंडगार पेय तुम्हाला लगेचच ताजेतवाने करेल आणि उन्हाच्या दाहापासून दिलासा देईल.
जर तुम्हाला मिठाईची आवड असेल आणि तुम्ही हेल्दी पर्याय शोधत असाल, तर चिया पुडिंग हा एक उत्कृष्ट पर्याय आहे. फळं, ड्रायफ्रूट्स, कोको पावडर किंवा अगदी मध मिसळून तुम्ही एक स्वादिष्ट आणि आरोग्यदायी डेझर्ट बनवू शकता.
सर्वात चांगली गोष्ट म्हणजे, यासाठी खूप मोठा डोस घ्यायची गरज नाही. दररोज फक्त 1-2 चमचे चिया बिया पुरेसे असतात. योग्य प्रमाणात आणि नियमित सेवन केल्यास, उन्हाळ्यातही तुम्ही फिट, फ्रेश आणि एनर्जेटिक राहू शकता.
