परदेशात शिक्षण घेण्याचं स्वप्न पाहणाऱ्या हजारो भारतीय विद्यार्थ्यांसाठी एक आनंदाची बातमी समोर आली आहे. उझबेकिस्तानने विद्यार्थ्यांसाठी एक खास संधी दिली आहे, जी त्यांच्या शिक्षणाचा भार हलका करत त्यांना जागतिक दर्जाचं शिक्षण आणि अनुभव दोन्ही देईल. आणि विशेष म्हणजे, ही संधी इतकी परिपूर्ण आहे की विद्यार्थ्यांना शिक्षणाच्या काळात खर्चाचा विचारही करावा लागणार नाही.
उझबेकिस्तानमधील शिष्यवृत्ती
उझबेकिस्तानच्या ऐतिहासिक समरकंद शहरात असलेल्या ‘सिल्क रोड इंटरनॅशनल युनिव्हर्सिटी ऑफ टुरिझम अँड कल्चरल हेरिटेज’ मध्ये 2025-26 सत्रासाठी मास्टर्स प्रोग्रामसाठी पूर्णपणे अनुदानीत शिष्यवृत्तीची घोषणा करण्यात आली आहे. ही शिष्यवृत्ती केवळ शिक्षणाचं शुल्कच नाही तर राहण्याचा, प्रवासाचा, आणि दरमहा ₹43,000 पर्यंतचा स्टायपेंडसुद्धा देते. म्हणजेच, केवळ ज्ञानाचंच नव्हे, तर जगाचा अनुभव घेण्याची संधीही इथे मिळते.
अभ्यासक्रम
या शिष्यवृत्तीच्या अंतर्गत विद्यार्थी पर्यटन, आतिथ्य, पुरातत्त्व, संग्रहालय अभ्यास आणि व्यवस्थापनासारख्या क्षेत्रांमध्ये मास्टर्स करू शकतात. शिक्षण पूर्णपणे इंग्रजी भाषेत दिलं जातं, त्यामुळे विद्यार्थ्यांना कोणत्याही भाषिक अडचणीचा सामना करावा लागणार नाही. आयईएलटीएसमध्ये किमान 6.0 बँड असणं आवश्यक आहे, परंतु जर विद्यार्थ्यांनी इंग्रजी माध्यमातून पदवी घेतली असेल तर ही अट लागू नाही.
शिष्यवृत्तीमध्ये दरमहा $500 म्हणजेच सुमारे ₹43,000 स्टायपेंड, हवाई प्रवासाचे दोन्ही मार्गांचे तिकीट, आणि निवासासाठी दरमहा $100 म्हणजेच ₹8,500 दिले जातात. शिवाय, सांस्कृतिक अभ्यासासाठी दोन वेळा उझबेकिस्तानमध्ये फ्री ट्रिपचंही provision आहे.
शिष्यवृत्तीसाठी कोण करू शकतो अर्ज?
या शिष्यवृत्तीसाठी अर्ज करणाऱ्या विद्यार्थ्यांकडे वैध पासपोर्ट आणि मान्यताप्राप्त विद्यापीठाची पदवी असावी लागते. त्याशिवाय त्यांना स्वतःचा सीव्ही, पासपोर्ट साईझ फोटो, आणि ‘एससीओ देशांच्या पर्यटन विकासात आपले योगदान काय असेल’ या विषयावर छोटासा (सुमारे दीड पानांचा) निबंध सादर करावा लागतो. अर्ज करण्याची अंतिम मुदत 1 ऑगस्ट 2025 असून, संपूर्ण प्रक्रिया विद्यापीठाच्या अधिकृत वेबसाइटवर ऑनलाइन पद्धतीने पार पाडता येते.
विद्यापीठाचा परिसर आधुनिक सुविधांनी सजलेला आहे, जिथे डिजिटल लायब्ररीपासून जिम, रेस्टॉरंट्स, स्विमिंग पूल, आरामदायक वसतिगृहं अशा सगळ्या गोष्टी विद्यार्थ्यांच्या वाट्याला येतात. या अनुभवामुळे विद्यार्थ्यांचं शिक्षण केवळ शैक्षणिक पुस्तकांपुरतं मर्यादित राहत नाही, तर ते जगण्याची एक समृद्ध कला घडवतं.
उझबेकिस्तान सरकारनं ही शिष्यवृत्ती शांघाय सहकार्य संघटनेतील (SCO) देशांमधील शैक्षणिक संबंध मजबूत करण्यासाठी सुरू केली आहे. भारत सरकार या प्रक्रियेत थेट सहभागी नसले तरी, ही संधी भारतीय विद्यार्थ्यांसाठी भविष्यातील दारे उघडणारी आहे.
