हवाई सफर म्हणजे केवळ एका ठिकाणाहून दुसऱ्या ठिकाणी जाण्याचा मार्ग नसतो, तर ती अनुभवांची, सुविधा आणि सौंदर्याची एक सफरही असते. जगभरात हजारो विमानतळ आहेत, पण त्यापैकी काही असे आहेत जे त्यांच्या भव्यतेमुळे, अत्याधुनिक सोयी-सुविधांमुळे आणि प्रवाशांसाठी दिल्या जाणाऱ्या अनुभवामुळे सातत्याने सर्वोत्तम ठरतात. अशीच एक यादी अलीकडे प्रसिद्ध झाली असून, जगातील टॉप 8 विमानतळांची नावे समोर आली आहेत. विशेष म्हणजे, या प्रतिष्ठेच्या यादीत भारताचे दोन विमानतळ देखील झळकले आहेत.
टॉप- 8 विमानतळांची यादी
दुबईच्या आंतरराष्ट्रीय विमानतळाचा विचार केला, तर हे केवळ एक प्रवास स्थानक नाही, तर एका राजवाड्यासारखे वाटते. सोन्याच्या झळाळीने सजलेली झाडे, अनगिनत लक्झरी ब्रँडची दुकाने, आणि संपूर्ण इमारतीत पसरलेले वैभव पाहून प्रवासी हरवून जातात. याच प्रकारची विलक्षण अनुभूती सिंगापूरच्या चांगी विमानतळावर मिळते. येथील इनडोअर गार्डन आणि पाण्याचा झराच एवढा सुंदर आहे की, 10 तासांचा थांबाही अपुरा वाटावा.
कतारमधील हमाद आंतरराष्ट्रीय विमानतळाने 2024 मध्ये तब्बल 52.7 मिलियन प्रवाशांना सेवा दिली असल्याची नोंद आहे. लक्झरी लाउंज आणि अत्याधुनिक सुविधांमुळे हे ठिकाण केवळ एक विमानतळ राहत नाही, तर पूर्ण एक अनुभव बनते. दुसरीकडे, दक्षिण कोरियातील इंचॉन विमानतळ त्याच्या कार्यक्षमतेसाठी आणि भव्य डिझाइनसाठी प्रसिद्ध आहे. याच ठिकाणी नेटफ्लिक्सवरील ‘स्क्विड गेम’ मालिकेची काही दृश्ये चित्रीत करण्यात आली होती, जे याचे सांस्कृतिक महत्त्व अधोरेखित करते.
जपानमधील हनेडा विमानतळ, इस्तंबूलचे विशाल विमानतळ ज्यात 2024 मध्ये 80 मिलियनहून अधिक प्रवासी आले आणि इस्तंबूलच्या लायब्ररीसारखी वैशिष्ट्ये ही या यादीतील इतर प्रभावी ठिकाणांची उदाहरणे आहेत. प्रत्येक ठिकाणाची खासियत वेगळी, पण अनुभवाचा दर्जा जगप्रसिद्ध.
भारतातील विमानतळ
या जागतिक दर्जाच्या यादीत भारतानेही आपली छाप सोडली आहे. मुंबईतील छत्रपती शिवाजी महाराज आंतरराष्ट्रीय विमानतळ आधुनिक भारतीय कलेचा सुंदर संगम दर्शवतो. प्रवाशांना इथे पारंपरिकतेचा आणि आधुनिकतेचा समतोल अनुभवायला मिळतो.
याशिवाय, हैदराबाद विमानतळाने देखील देशाचे नाव उंचावले आहे. हे भारतातील पहिले ग्रीनफील्ड विमानतळ असून ते उच्च दर्जाची सेवा देणाऱ्या विमानतळांमध्ये गणले जाते. भारतातील चौथ्या क्रमांकाचे सर्वात व्यस्त विमानतळ म्हणूनही त्याने आपले स्थान मजबूत केले आहे.
या सर्व विमानतळांचा विचार करताना, लक्षात येते की हवाई सफर ही आता केवळ प्रवासाची गरज न राहता ती एक शाही अनुभव बनली आहे. आणि भारत देखील यात अग्रेसर असल्याचे या यादीतून स्पष्ट होते.
