प्रेम, पैसा आणि यश सगळं काही एकदाच मिळतं! राजासारखं जीवन जगणारे ‘हे’ मूलांक कोणते?

जन्मतारीख आपल्या आयुष्यावर किती खोल परिणाम करू शकते, याचा विचार करताना अनेकांना आश्चर्य वाटतं. पण अंकशास्त्र या प्राचीन विद्येनुसार, प्रत्येक अंकामध्ये एक विशिष्ट ऊर्जा असते जी त्या व्यक्तीच्या स्वभावावर, आयुष्याच्या प्रवासावर आणि नशिबावर परिणाम करत असते. विशेषतः काही अंक असतात जे जन्माला आलेल्या व्यक्तीला जणू नशिबाचे धनी बनवतात. अशा व्यक्तींकडे ना प्रेमाची कमतरता असते, ना पैशाची!

या अशा तीन खास संख्यांमध्ये 2, 6 आणि 7 यांचा समावेश होतो. या संख्यांचे लोक आयुष्यात यश, संपत्ती आणि समृद्धीचा अनुभव घेतात, पण त्यांच्या या प्रवासात भावनांचा, नात्यांचा आणि अंतर्ज्ञानाचा फार मोठा वाटा असतो.

अंक 2

ज्यांचा जन्म महिन्याच्या 2, 11, 20 किंवा 29 तारखेला झाला असेल, त्यांचा अंक 2 मानला जातो. अशा लोकांवर चंद्राचं राज्य असतं आणि त्यामुळे ते अतिशय भावूक, मृदू स्वभावाचे आणि संवेदनशील असतात. त्यांचं मन सतत नाजूक भावना घेऊन भरलेलं असतं. ते प्रेमात फार गुंततात आणि नात्यांमध्ये खूप समर्पित राहतात. एकदा का एखाद्याशी नातं जोडलं की ते तुटू नये यासाठी हे लोक शेवटपर्यंत प्रयत्न करतात. मेहनतीच्या जोरावर त्यांना भरपूर संपत्ती मिळते, विशेषतः अशा क्षेत्रांमध्ये जेथे लोकांशी संवाद, कला किंवा सौंदर्य यांचा संबंध असतो. त्यांना खर्च करायला आवडतं, पण तेवढंच शहाणपणाने बचतही करतात.

अंक 6

पुढील क्रमांक म्हणजे 6 शुक्राचा अंक. याला ‘प्रेमाचा राजा’ असंही म्हटलं जातं. 6 क्रमांकाचे लोक अतिशय आकर्षक, प्रेमळ आणि जबाबदार असतात. त्यांचं व्यक्तिमत्त्व इतकं मोहक असतं की लोक सहज त्यांच्या प्रेमात पडतात. हे लोक नात्यांमध्ये खूप सच्चे असतात. आपल्या प्रिय व्यक्तीला खुश ठेवण्यासाठी हे काहीही करतात. विलासिता, सुंदरता आणि चविष्ट जीवनशैलीकडे त्यांचा ओढा असतो. अशा लोकांचं जीवन सहसा आर्थिकदृष्ट्या समृद्ध असतं. ते केवळ पैशाची कमाई करत नाहीत, तर त्याचा योग्य उपयोगही करतात. त्यांच्या हातून अनेकदा मोठ्या मालमत्ता तयार होतात, कारण त्यांचं आकर्षण आणि समजूतदारपणा व्यवसायातही उपयोगी ठरतो.

अंक 7

शेवटी येतो 7 अंक. थोडा रहस्यमय, थोडा गूढ, पण अतिशय शक्तिशाली. या अंकाचा स्वामी ग्रह आहे केतू. 7 क्रमांकाचे लोक विचारांनी खूप खोल असतात. बाहेरून शांत आणि संयमी दिसणारे हे लोक त्यांच्या मनात मात्र सतत विचारांच्या लाटा घेऊन फिरत असतात. ते कुठल्याही गोष्टीवर लवकर विश्वास ठेवत नाहीत, पण एकदा ठाम झाले की मग मागे वळून पाहत नाहीत. प्रेमात हे खूप प्रामाणिक आणि खरे असतात. त्यांना नात्यांमध्ये केवळ शरीरापेक्षा भावनिक आणि आध्यात्मिक जोड आवश्यक असते. कधी कधी ते आपल्या आंतरविश्वात इतकं हरवून जातात की इतरांना त्यांचे अंतरंग समजणं कठीण जातं.

हे लोक विज्ञान, तंत्रज्ञान, लेखन, संशोधन किंवा अध्यात्मात यश मिळवतात. त्यांच्या कल्पनाशक्तीला गती मिळाली, की ते मोठं नाव कमावतात. आणि पैशाबाबत सांगायचं झालं, तर त्यांच्या हातून सहज पैसा खर्च होत नाही. ते गुंतवणुकीच्या योग्य जागा ओळखतात आणि भविष्यासाठी चांगली तयारी करतात.