बारावी नंतर विज्ञान शाखेत काय करायचं, हा प्रश्न अनेक विद्यार्थ्यांच्या आणि त्यांच्या पालकांच्या मनात सतत घर करून असतो. अनेकांना वाटतं की एमबीबीएस किंवा बी.टेक हाच एकमेव पर्याय आहे, पण आजचा काळ बदलला आहे. नव्या तंत्रज्ञानाच्या युगात, विज्ञान शाखेच्या विद्यार्थ्यांसमोर अनेक दमदार आणि भविष्य घडवणारे पर्याय खुले झाले आहेत.
डेटा सायन्स आणि आर्टिफिशियल इंटेलिजेंस
आजचा काळ हा डेटा आणि तंत्रज्ञानाचा आहे. डेटा सायन्स आणि आर्टिफिशियल इंटेलिजेंस हे क्षेत्र सध्या सर्वाधिक वेगाने वाढत आहेत. आरोग्यसेवा असो, ई-कॉमर्स की शिक्षण प्रत्येक ठिकाणी डेटा वापरून निर्णय घेतले जात आहेत. या क्षेत्रात प्रवेश करण्यासाठी तुम्ही संगणक विज्ञान, मशीन लर्निंग किंवा एआयसारख्या विषयांत बीएससी करू शकता. एकदा का तुम्हाला चांगले कौशल्य मिळाले, की तुम्ही 8-10 लाखांच्या सुरुवातीच्या पगारापासून सुरुवात करू शकता आणि पुढे तुमचा अनुभव कोट्यवधींच्या पातळीवर तुम्हाला घेऊन जाऊ शकतो.
जैवतंत्रज्ञान
कोविडनंतर संपूर्ण जगाने जैवतंत्रज्ञानाच्या शक्तीला ओळख दिली. लस तयार करण्यापासून ते अनुवांशिक विकारांच्या संशोधनापर्यंत, या क्षेत्रात उत्तम करिअर घडू शकतं. जैवतंत्रज्ञान, अनुवंशशास्त्र किंवा सूक्ष्मजीवशास्त्रात बीएससी केल्यानंतर मोठ्या फार्मा कंपन्या, कृषी संशोधन संस्था किंवा वैद्यकीय संशोधन केंद्रांमध्ये काम करण्याची संधी मिळते.
फॉरेन्सिक सायन्स
जर तुम्हाला गुन्हे उकलण्यात रस असेल, तर फॉरेन्सिक सायन्स हे एक थरारक आणि सामाजिकदृष्ट्या महत्त्वाचं करिअर असू शकतं. बीएससी इन फॉरेन्सिक सायन्स पूर्ण केल्यानंतर सीबीआय, एनआयए किंवा पोलिसांच्या गुन्हे शाखेत वैज्ञानिक सल्लागार म्हणून काम करता येतं.
सस्टेनेबिलिटी स्टडीज
हवामान बदल आणि पर्यावरण रक्षण ही आता केवळ चर्चेची विषयं राहिलेली नाहीत, तर करिअरची नवी वाटसुद्धा बनली आहे. पर्यावरण विज्ञान, सस्टेनेबिलिटी स्टडीज किंवा हवामानशास्त्रात बीएससी केल्यास जागतिक संस्था, एनजीओ किंवा धोरणात्मक संशोधन संस्थांमध्ये जबाबदारीच्या भूमिका मिळू शकतात.
भौतिकशास्त्र
आणखी एक उपेक्षित पण प्रगल्भ क्षेत्र म्हणजे मूलभूत विज्ञान म्हणजे भौतिकशास्त्र आणि गणित. ज्यांना सैद्धांतिक विचार आणि खोलगट प्रश्नांचा शोध घेण्याची आवड आहे, त्यांच्यासाठी हे क्षेत्र स्वप्नवत ठरू शकतं. बीएससीनंतर तुम्ही इस्रो, डीआरडीओ, बीएआरसीसारख्या प्रतिष्ठित संस्थांमध्ये वैज्ञानिक बनू शकता. तसेच आंतरराष्ट्रीय पीएचडी फेलोशिप आणि रिसर्च प्रोजेक्ट्सची दारे उघडतात.
शेवटी सांगायचं झालं, तर विज्ञान शाखेतील विद्यार्थ्यांसाठी आज जग अगदी खुले आहे. नव्या कल्पना, नव्या वाटा आणि आधुनिक शिक्षणाच्या मदतीने, केवळ डॉक्टर किंवा इंजिनिअर न होता, तुम्ही भविष्य घडवणारे संशोधक, डेटा विश्लेषक, हवामान तज्ञ किंवा फॉरेन्सिक अधिकारी बनू शकता.
