अंकशास्त्र ही एक अशी शास्त्रशाखा आहे, जिच्यामध्ये तुमच्या जन्मतारखेच्या आधारावर भविष्यातील शक्यता सांगितल्या जातात. ही शास्त्रीय पद्धत तुम्हाला तुमचं व्यक्तिमत्त्व, करिअर, यश-अपयश, आर्थिक स्थिती याविषयी महत्त्वपूर्ण माहिती देते. यश, ओळख, प्रसिद्धी याच्या वाटा अनेकांच्या आयुष्यात येतात, पण अंक 1 असलेल्या लोकांसाठी या सगळ्या गोष्टी जणू त्यांच्या रक्तातच असतात. कुठेही गेले तरी ते वेगळेच भासतात, आणि त्यांच्या आयुष्यातली प्रत्येक गोष्ट इतरांपेक्षा थोडी अधिक उठून दिसते.
मूलांक 1
अंकशास्त्रात प्रत्येक जन्मतारीख एका विशिष्ट संख्येशी जोडलेली असते, आणि यामुळे त्या व्यक्तीचा स्वभाव, जीवनशैली, यशाचे मार्ग ठरतात. ज्या लोकांचा जन्म 1, 10, 19 किंवा 28 तारखेला झाला आहे, त्यांचा मूलांक 1 मानला जातो. हा अंक काही साधा-सोप्या वाटेवर चालणारा नसतो, तर स्वतःचं वेगळं स्थान निर्माण करणारा असतो. आणि म्हणूनच हे लोक बहुतांश वेळा नोकरीपेक्षा स्वतःचा व्यवसाय सुरू करतात आणि त्यात यशस्वी ठरतात.
यामागचं एक मोठं कारण म्हणजे या लोकांच्या व्यक्तिमत्त्वात असलेलं आत्मविश्वासाचं तेज. त्यांचं नेतृत्वगुण, निर्णय घेण्याची क्षमता आणि काहीतरी नविन करून दाखवण्याची तळमळ त्यांना सतत पुढे नेत असते. त्यांच्यावर सूर्य देवाचा प्रभाव असतो, आणि त्यामुळेच त्यांच्यात एक नैसर्गिक तेज असतं. सूर्य म्हणजे प्रकाश, ऊर्जेचा स्रोत, आणि अंक 1 असलेले लोकही त्यांच्या जीवनात तशाच प्रकारे प्रकाश पसरवतात.
स्वभाव आणि गुण
या लोकांना अडचणींचं काही फारसं वाटत नाही. संकटं आली, थोडा संघर्ष झाला तरी ते मागे हटत नाहीत. उलट अशा प्रसंगात ते अधिक ठामपणे उभे राहतात. ध्येय कितीही मोठं असो, ते त्याला गाठल्याशिवाय स्वस्थ बसत नाहीत. त्यांच्या मेहनतीचा आणि चिकाटीचा परिणाम असा दिसतो की एक दिवस ते त्या उंच शिखरावर पोहोचतात, जिथे पोहोचणं अनेकांना स्वप्नासारखं वाटतं.
संपत्ती, प्रतिष्ठा, समाजातला मान-सन्मान, हे सगळं त्यांच्या वाट्याला येतं. पण हे सगळं सहजासहजी मिळत नाही, त्यामागे असतो त्यांचा खडतर प्रवास आणि अपार श्रम. अनेकदा ते लोकांचा विरोध सहन करतात, अपयश झेलतात, पण तरीही आपली दिशा बदलत नाहीत. त्यांच्या जीवनाची वाटचाल ही प्रेरणादायी असते. म्हणूनच, समाजात त्यांच्या नावाचा एक वेगळा ठसा उमटलेला दिसतो.
