श्रावण महिन्याच्या या पवित्र शनिवारी एक खास संयोग घडून येत आहे, या दिवशी आडल योग जुळून येतोय. एकीकडे आडल योग ज्योतिषशास्त्रात अशुभ मानला जातो, तर दुसरीकडे श्रावणातील शनिवार म्हणजे शनीदेवाला प्रसन्न करण्याची सुवर्णसंधी. या विरोधाभासातूनही एक सकारात्मक मार्ग शोधता येतो. योग्य श्रद्धा आणि शास्त्रानुसार पूजा केली, तर शनीदेवाचे आशीर्वाद मिळवता येतात, अगदी कठीण काळालाही सौम्य करता येतं.
कधी तयार होतोय ‘आडल योग’?
या शनिवारची खास गोष्ट म्हणजे तो श्रावण शुक्ल पक्षातील दुसरा दिवस आहे आणि या दिवशी ‘आडल योग’ तयार होत आहे. आडल योग शुभ कार्यांसाठी योग्य नाही असं मानलं जातं. लग्न, नवीन कामाची सुरुवात किंवा महत्त्वाचे करार अशा गोष्टी टाळण्याचा सल्ला दिला जातो. पण हेच योग जर योग्य पद्धतीने साजरे केले, तर अशुभतेला परावृत्त करण्याची शक्तीही प्राप्त होते. याच कारणामुळे, अशा योगांमध्ये विशेषतः शनीदेवाची पूजा करणं, त्यांची उपासना व्रत करणं, हे फारच प्रभावी मानलं जातं.
अभिजित मुहूर्त या दिवशी दुपारी 12:00 ते 12:55 पर्यंत असेल, तर राहुकाळ सकाळी 9:03 पासून 10:45 पर्यंत असेल. या वेळांचा विचार करून पूजेला योग्य वेळ निवडणं हे अतिशय महत्त्वाचं असतं. शनीदेवाच्या पूजेसाठी ब्रह्म मुहूर्त हा सर्वोत्तम काळ मानला जातो. त्या वेळी उठून स्नान करून, शुद्ध मनाने आणि जागरूकतेने पूजा केली, तर तिचं फळ अनेक पटींनी मिळतं.
‘या’ वस्तूंचे दान करा
पूजेच्या वेळी शनिदेवाला काळ्या वस्तू अर्पण करणं, जसं की काळे कपडे, काळे तीळ, काळी उडीद डाळ, मोहरीचं तेल याला फार महत्त्व आहे. शनिदेवाच्या मूर्तीला पाण्याने स्नान घालून, त्यांच्यासमोर मोहरीच्या तेलाचा दिवा लावावा. त्यानंतर शनी स्तोत्र, सुंदरकांड, हनुमान चालीसा यांचं पठण करावं. विशेषतः राजा दशरथ यांनी रचलेलं शनि स्तोत्र मोठ्या भक्तिभावाने म्हटलं, तर ते शनीदेवाच्या कृपेसाठी प्रभावी मानलं जातं.
शनिदेव हे फक्त शिक्षा करणारे नव्हे, तर योग्य वागणाऱ्याला भरभरून आशीर्वाद देणारेही आहेत. म्हणूनच शनिवारी त्यांची पूजा केली, व्रत पाळलं, तर आयुष्यातील अडथळे कमी होतात, आणि नकारात्मक ऊर्जा दूर होते. अनेकांना हे माहीत नसेल, पण पिंपळाच्या झाडाखाली शनिदेव वास करतात असं मानलं जातं.
त्यामुळे शनिवारी पिंपळाच्या झाडाखाली मोहरीच्या तेलाचा दिवा लावणं आणि काळा कपडा, चष्मा, किंवा भांडे दान करणं याने शनिदेव प्रसन्न होतात, आणि जीवनात सौख्य, स्थैर्य आणि यश मिळतं.
सात शनिवारी करा व्रत
श्रावणातील सात शनिवारी व्रत केल्याने, असे मानले जाते की शनीची साडेसाती आणि ढय्या यांसारख्या ग्रहदोषांपासून मुक्ती मिळते. ज्यांच्या कुंडलीत शनीदोष आहे, अशा व्यक्तींनी हे व्रत विशेष श्रद्धेने पाळावं. यामुळे फक्त ग्रहशांतीच नाही, तर मानसिक स्थैर्य आणि सकारात्मक ऊर्जा यांचाही अनुभव येतो.
