मालदीव हा देश भारतीय पर्यटकांच्या मनात खास स्थान निर्माण करून आहे. आपल्या देशापासून काहीच तासांच्या अंतरावर असलेला हा नंदनवनसारखा बेटसमूह, वर्षभर पर्यटकांनी गजबजलेला असतो. पण तुमच्या खिशात ₹1000 असतील, तर त्या रकमेची खरंच तिथे किती किंमत आहे? हे जाणून घेतल्यावर तुम्हाला तुमच्या बजेटच्या निर्णयांबाबत एक वेगळीच समज मिळेल.
मालदीव म्हणजे केवळ सुट्टीचा एक पर्याय नाही, तर अनेकांसाठी तो एक ‘ड्रीम डेस्टिनेशन’ आहे. इथे जगभरातून पर्यटक येतात, पण विशेषतः भारतीयांची उपस्थिती लक्षणीय असते. बॉलिवूडमधील अनेक मोठमोठ्या नावांनी या बेटांना पसंती दिल्यामुळे, या ठिकाणाची लोकप्रियता झपाट्याने वाढली. 2023 मध्ये सुमारे 2 लाख भारतीय पर्यटकांनी मालदीवमध्ये सुट्टी घालवली होती. पण 2024 मध्ये भारत आणि मालदीवमधील राजकीय नातेसंबंधांतील तणावामुळे ही संख्या घसरून 1.30 लाखांपर्यंत आली. तरीही, येथील सौंदर्य आणि शांततेबद्दल भारतीय पर्यटकांची ओढ अजूनही तशीच टिकून आहे.
तुम्ही मालदीवच्या प्रवासाची तयारी करत असाल, तर सर्वात महत्त्वाची गोष्ट म्हणजे तुमच्या खिशात असलेल्या पैशांची तेथील ‘वास्तविक’ किंमत काय आहे, हे समजून घेणे. मालदीवचे स्थानिक चलन ‘मालदीवियन रुफिया’ (MVR) आहे, ज्यात समुद्री जीवन, स्थानिक पोशाख आणि बेटांचे सौंदर्य यांचं प्रतिबिंब त्यांच्या नोटा आणि नाण्यांवर दिसतं. हे चलन इतर देशांच्या चलनांपेक्षा अधिक सौंदर्यशील आणि स्थानिक संस्कृतीशी जोडलेलं आहे.
1 रुपयाचे मूल्य
जुलै 2025 मध्ये 1 भारतीय रुपया सुमारे 0.1782 MVR एवढा आहे. याचा अर्थ, ₹1000 म्हणजे जवळपास 178 MVR. अर्थातच, हे विनिमय दर दररोज थोडेफार बदलत असतात, त्यामुळे मालदीवला रवाना होण्याआधी अपडेट केलेला दर पाहणं गरजेचं आहे. पण या अंदाजानुसार, एवढ्या रकमेने तिथे तुम्ही काय करू शकता?
तुमच्याकडे ₹1000 म्हणजे सुमारे 178 MVR असतील, तर मालदीवमध्ये छोट्या आणि गरजेच्या खरेदीसाठी ही रक्कम उपयोगी ठरू शकते. स्थानिक फूड स्टॉल्समधून तुम्ही ज्यूस, सँडविच, ताजी फळं अशा गोष्टी 10 ते 50 MVR मध्ये घेऊ शकता. एक पाण्याची बाटली, बिस्किटांचा पुडा, किंवा इन्स्टंट नूडल्सही सहज मिळू शकतात.
₹1000 मध्ये काय-काय येईल?
पर्यटनासाठी फिरताना तुम्हाला फेरी सेवा किंवा स्थानिक बसचा वापर करावा लागतो, ज्याची किंमतही 3 ते 20 MVR दरम्यान असते. एवढ्याच किंमतीत तुम्ही काही लहान स्मृतिचिन्हे किंवा हस्तकला वस्तूही खरेदी करू शकता, ज्या तुमच्या या प्रवासाची आठवण जपतील. मात्र, जर तुमचा मुक्काम एखाद्या लक्झरी रिसॉर्टमध्ये असणार असेल, तर ₹1000 हे फक्त एका कॉफीच्या कपापुरतेच पुरतील.
मालदीवमध्ये जर तुम्हाला स्थानिक संस्कृतीचा आस्वाद घ्यायचा असेल, तर ₹1000 मध्ये खूप काही करता येऊ शकतं. पण जर तुमचा हेतू ‘फाईव्ह स्टार लक्झरी’चा असेल, तर तुम्हाला अधिक बजेटची तयारी ठेवावी लागेल. प्रवासाला निघण्याआधी चलन दर तपासा, तुमचा खर्च ठरवा आणि मगच स्वप्नवत मालदीवची सफर सुरू करा.
