निसर्गाच्या कुशीत काही दिवस घालवण्याची इच्छा कोणाच्या मनात नाही? शहराच्या गोंगाटापासून दूर, हिरव्यागार टेकड्यांवर आणि निळ्या आकाशाखाली निवांत वेळ घालवायचा असेल, तर कॅम्पिंग हा अनुभव एक वेगळीच जादू निर्माण करतो. पण या निसर्गरम्य प्रवासात खरोखर आनंद घ्यायचा असेल, तर काही महत्त्वाच्या गोष्टींची काळजी घेणं तितकंच गरजेचं आहे. कारण थोडीशी तयारी तुम्हाला एक अविस्मरणीय आठवण देऊ शकते, तर थोडीशी अडचण हा आनंदच हिरावून घेऊ शकते.
हवामानाचा अंदाज
कॅम्पिंगसाठी निघण्याआधी सर्वप्रथम हवामानाचा अंदाज घेणं खूप महत्त्वाचं आहे. निसर्ग आपलं रूप कधीही बदलू शकतो. एकीकडे उबदार ऊन असताना अचानक आलेल्या पावसामुळे तुमचं सगळं सामान भिजू शकतं. अशावेळी हवामानाचा अंदाज घ्या आणि त्यानुसार योग्य कपडे, रेनकोट किंवा टेंट तयार ठेवा.
छोट्या-छोट्या गोष्टींची यादी करा
ट्रिपवर निघण्याआधी प्रत्येक छोट्या-छोट्या गोष्टींची यादी करणं तुमचं काम नंतर खूपच सोपं करतं. तंबू, स्लीपिंग बॅग, टॉर्च, माचिस किंवा लाईटर, पॉवर बँक, मोबाइलचा बॅकअप या गोष्टी विसरल्या तर रात्रीचा अंधार आणि थंडी तुमची परीक्षा घेतील. म्हणून अशी यादी तयार करून, त्यातील प्रत्येक गोष्ट व्यवस्थित घेतली आहे का याची खात्री करा.
सुरक्षित जागा
जिथे तुम्ही टेंट लावणार आहात, ती जागा सुरक्षित आणि समतल असली पाहिजे. डोंगराच्या कड्यावर किंवा पाण्याजवळची जागा खूप आकर्षक वाटत असली तरी ती धोकादायक ठरू शकते. घनदाट जंगलात, विशेषतः वन्य प्राणी येण्याच्या शक्यता असलेल्या भागात टाळावे. थोडीशी दूर वाट पाहिली तरी, सुरक्षितता ही सगळ्यात महत्त्वाची गोष्ट आहे.
पाणी आणि अन्न
कॅम्पिंगमध्ये पाणी आणि अन्न म्हणजे आधारस्तंभच. दूरवर असलेल्या या ठिकाणी जवळचं काहीही मिळण्याची खात्री नसते. त्यामुळे योग्य प्रमाणात पिण्याचं पाणी आणि खाण्याच्या वस्तू बरोबर असणं अत्यावश्यक आहे. हे नसल्यास आनंदाच्या जागी त्रास होऊ शकतो.
निसर्गात जसं आपण आलं, तसंच निसर्गाला परत ठेवणं ही आपली जबाबदारी असते. कॅम्पिंगनंतर कचरा जिथे-तिथे टाकणं म्हणजे त्या जागेचा अपमानच आहे. जेवढा शक्य होईल तेवढा कचरा परत घेऊन जा किंवा योग्य ठिकाणी टाका. त्यामुळे पुढच्यांनाही तो परिसर तितकाच सुंदर आणि स्वच्छ वाटेल.
हेल्पलाइन नंबर
शेवटी, कधीही अनपेक्षित परिस्थिती येऊ शकते. कॅम्पिंग दरम्यान कोणत्या अपघात किंवा अडचणी आल्या, तर मदत मिळणं शक्य असेल यासाठी आधीच तयारी करून ठेवा. तुमच्या जवळच्या व्यक्तींना, मित्रांना किंवा कुटुंबीयांना तुम्ही कुठे आहात याची माहिती द्या. सोबत आपत्कालीन नंबर लिहून ठेवा, शक्य असल्यास सिग्नल नसलेल्या भागासाठी एखादं बेसिक वायरलेस डिव्हाईस घेऊन जा.
