प्रेम हे माणसाच्या आयुष्यातील सर्वात नाजूक आणि संवेदनशील भावना असते. पण ज्या क्षणी हे प्रेम विवाहाच्या रूपात स्थिर होतं, तेव्हा त्याची गंभीरता आणि जबाबदारी दुप्पट वाढते. आजच्या पिढीतील तरुण-तरुणी प्रेमात पडतात, एकमेकांना जीव लावतात आणि नंतर थेट विवाह करण्याचा निर्णय घेतात. मात्र हे नातं केवळ प्रेमावर टिकतं का? यामागे अजून काही गोष्टींचा विचार करणे तितकंच महत्त्वाचं आहे. याच मुद्द्यावर प्रेमानंद जी महाराजांनी काही अत्यंत मोलाचे सल्ले दिले आहेत, जे प्रेमविवाह करणाऱ्यांना त्यांच्या नात्याला दीर्घकाळ टिकवण्यासाठी मदतीचे ठरू शकतात.
शारीरिक आकर्षण क्षणिक
प्रेमानंद जी महाराज स्पष्टपणे सांगतात की नात्याचा पाया जर केवळ शारीरिक आकर्षणावर रचला गेला असेल, तर ते फार काळ टिकणार नाही. आकर्षण क्षणिक असतं. सुरुवातीला ते गोंडस वाटतं, पण काळ जसजसा पुढे जातो, तसतसं त्याचं अस्तित्वही क्षीण होतं. म्हणून प्रेमविवाह करताना केवळ सौंदर्य किंवा आकर्षणाचा विचार न करता त्या व्यक्तीचा स्वभाव, सवयी, विचारसरणी यांचा सखोल अभ्यास करावा लागतो.
आई-वडिलांची संमती
या नात्यामध्ये फक्त दोन व्यक्ती नाहीत, तर त्यांचं संपूर्ण कुटुंब सामील होतं, हे विसरू नये. प्रेमानंद जी महाराज यावर भर देतात की कोणताही निर्णय घेताना आई-वडिलांची संमती घेणं फार गरजेचं आहे. लग्नासारख्या महत्त्वाच्या निर्णयात पालकांची भूमिका फार मोठी असते. त्यांच्या आशिर्वादाशिवाय स्थैर्य मिळणं कठीण ठरतं.
नात्याची शुद्धता
महाराजांनी आणखी एक मुद्दा मांडला तो म्हणजे नात्याची शुद्धता. ते सांगतात की लग्नापूर्वी शारीरिक मर्यादा राखणं म्हणजे नात्याला प्रतिष्ठेची किनार देणं होय. पवित्रतेचा आदर केल्याने प्रेमाचं मूल्य अधिक वृद्धिंगत होतं. ही काळजी जर ठेवली गेली, तर विवाहाच्या नंतरही एकमेकांमधील आदर आणि समर्पण अधिक गहिरं होतं.
विश्वास
जोडीदारावर विश्वास ठेवणं, हे प्रत्येक नात्याचं खंबीर आधारस्तंभ आहे. महाराजांचा विश्वास आहे की जेव्हा दोघांमध्ये पारदर्शकता आणि विश्वास असतो, तेव्हा कोणत्याही वादळात हे नातं ढळत नाही. पण जर शंका आणि अपुरा संवाद नात्यामध्ये असेल, तर ते दिवसेंदिवस उधळून जातं.
भूतकाळ विसरा
शेवटी, प्रेमानंद जी महाराज एक अत्यंत सूक्ष्म पण महत्त्वाचा सल्ला देतात. भूतकाळाला मागे टाका. लग्नानंतर जुनी प्रेमप्रकरणं, चुका, आठवणी सतत समोर आणणं म्हणजे नव्या आयुष्याला अडथळा आणणं होय. जोडीदाराची मनःशांती आणि नात्याचं आरोग्य टिकवायचं असेल, तर भूतकाळ विसरणं आणि भविष्यावर लक्ष केंद्रित करणं आवश्यक आहे.
प्रेम ही एक सुंदर भावना आहे, पण त्यात जबाबदारी, समजूत, संयम आणि एकमेकांवरचा विश्वास मिसळल्याशिवाय कोणतंही नातं दीर्घकाळ टिकत नाही. प्रेमविवाहाचं स्वप्न साकार करताना हे सगळं लक्षात घेतलं तरच ते खरं प्रेम ठरतं. काळाच्या कसोटीत टिकणारं आणि आयुष्यभरासाठी साथ देणारं.
