2004 साली रिलीज झालेला ‘धूम’ हा चित्रपट बॉक्स ऑफिसवर प्रचंड गाजला होता. मात्र, या चित्रपटामागे एक अशी कहाणी दडलेली आहे जी फार थोड्यांना माहिती आहे. ही कहाणी आहे दोन बड्या स्टार्सच्या नकारामुळे एका फ्लॉप अभिनेत्याचं करिअर बनण्याची. सलमान खान आणि संजय दत्त, दोघंही 90 च्या दशकात बॉलीवूडवर अधिराज्य गाजवणारे नावं.
एक काळ होता की त्यांच्या नावावर चित्रपट हिट ठरत होते. ‘साजन’सारखा हळुवार, भावनात्मक चित्रपट त्यांनी एकत्र केला होता, ज्यात माधुरी दीक्षितसारखी सुपरस्टार अभिनेत्री होती. तो चित्रपट आजही लोकांच्या हृदयात घर करून बसलाय. पण वेळ बदलते, प्राधान्यं बदलतात, आणि बऱ्याचदा कलाकारही त्यांच्या निवडींबाबत चुकीचे निर्णय घेतात.
‘धूम’ चित्रपट
असंच काहीसं झालं जेव्हा 2004 साली ‘धूम’ या चित्रपटासाठी कलाकारांची निवड सुरू होती. हा चित्रपट यशराज फिल्म्सच्या बॅनरखाली, दिग्दर्शक संजय गढवी यांनी दिग्दर्शित केला होता. स्टाईल, अ‍ॅक्शन आणि म्युझिकने परिपूर्ण असलेल्या या चित्रपटात विलन कबीरची भूमिका सर्वात महत्त्वाची होती, एक असा करिष्मा असलेला नकारात्मक पात्र जो प्रेक्षकांना त्याच्या बाजूनेही बोलायला भाग पाडेल.
हीच भूमिका सुरुवातीला सलमान खानला ऑफर करण्यात आली होती. पण काही कारणास्तव सलमानने ती संधी नाकारली. पुढे ती संजय दत्तपर्यंत गेली. पण त्यानेही ती नाकारली. अशा वेळेस ही भूमिका मिळाली एक अशा अभिनेत्याला ज्याचं करिअर फारसं बहरलेलं नव्हतं तो म्हणजे जॉन अब्राहम.
जॉन अब्राहमला मिळाली भूमिका
जॉनसाठी ही भूमिका केवळ एक रोल नव्हता, तर एक संधी होती स्वतःला पुन्हा सिद्ध करण्याची. त्याने कबीरची भूमिका इतक्या सहजतेने केली की प्रेक्षक त्याच्या स्टाईल, त्याच्या अ‍ॅक्शन स्टाइलने भारावून गेले. ‘धूम’च्या यशामध्ये जॉनचं योगदान केवळ महत्त्वाचं नव्हतं, तर निर्णायक होतं.
या चित्रपटात जॉनसोबत अभिषेक बच्चन, उदय चोप्रा, ईशा देओल आणि रिमी सेनसारखे कलाकारही होते. पण जॉनचा कबीर हा रोल सर्वांचं लक्ष वेधून गेला. ‘धूम’च्या यशामुळे त्याचं करिअर नव्या उंचीवर पोहोचलं. अनेक चित्रपट निर्माता आणि दिग्दर्शकांनी त्याच्यावर विश्वास दाखवला, आणि जॉन अब्राहम या नावाला बॉलीवूडमध्ये एक नवी ओळख मिळाली.
कधीकधी, मोठे स्टार्स एखादी संधी नाकारतात, आणि तीच संधी कोणालातरी जीवन बदलणारी ठरते. ‘धूम’ हे त्याचं उत्तम उदाहरण आहे. सलमान आणि संजयने जर ही भूमिका स्वीकारली असती, तर कदाचित जॉनच्या नशिबाने असा पलट घेतला नसता. पण याच नकारांमुळे एका ‘फ्लॉप’ समजल्या गेलेल्या अभिनेत्याचं नशीब एक झटक्यात उजळलं.
