आंतरराष्ट्रीय क्रिकेटमध्ये चमकदार शतकं, रेकॉर्ड ब्रेक कामगिरी आणि ऐतिहासिक विजय पाहायला मिळतात. पण या खेळात काही क्षण असेही असतात जे खेळाडूंना विसरायचे असतात. कारण, ते लज्जास्पद असतात. क्रिकेट इतिहासात अशा काही रेकॉर्ड्सची नोंद झाली आहे की जे कोणत्याही क्रिकेटपटूच्या नावावर असावं असं त्यालाही वाटत नाही. आणि तरीही, या गोष्टी इतिहासाचा भाग बनतात, चाहत्यांच्या लक्षात राहतात आणि कधीकधी थट्टेचा विषयही ठरतात.
वसीम अक्रम
पाकिस्तानचे माजी क्रिकेटपटू इंझमाम-उल-हक आणि वसीम अक्रम यांचे नाव एक विचित्र विक्रमासाठी घेतले जाते, ते म्हणजे वनडे क्रिकेटमध्ये सर्वाधिक वेळा रनआउट होणारे खेळाडू. रनआउट ही फलंदाजासाठी एक निराशाजनक आणि कधीकधी हास्यास्पदरीत्या घडणारी गोष्ट असते, आणि या दोघांनी प्रत्येकी 38 वेळा अशा प्रकारे बाद होण्याची कामगिरी केली आहे.
कोर्टनी वॉल्श
वेस्ट इंडिजचा वेगवान गोलंदाज कोर्टनी वॉल्श, ज्याने आपल्या देशासाठी 500 हून अधिक कसोटी बळी घेतले, त्याची फलंदाज म्हणून कामगिरी मात्र फारशी आठवणीत राहण्यासारखी नाही. त्याने कसोटीत तब्बल 43 वेळा ‘डक’ घेतला म्हणजे शून्यावर बाद झाला. गोलंदाज म्हणून महान, पण फलंदाज म्हणून निराशाजनक अशी त्याची कारकीर्द होती.
राहुल द्रविड
भारतीय चाहत्यांसाठी राहुल द्रविड म्हणजे ‘द वॉल’ एक असा फलंदाज जो संकटाच्या क्षणी डगमगत नाही. मात्र त्याच्या नावावरही एक अशी नोंद आहे जी विशेष मानली जात नाही. द्रविड कसोटीत 55 वेळा बोल्ड झाला, आणि ही संख्या जगातील सर्वाधिक आहे. अगदी सचिन तेंडुलकरसुद्धा 54 वेळा बोल्ड झाला होता, त्यामुळे या आकडेवारीत द्रविडने त्यालाही मागे टाकलं आहे.
मोहम्मद सामी
गोलंदाजी करताना प्रत्येक बॉलची मोजदाद असते एक षटक म्हणजे सहा चेंडू, पण पाकिस्तानचा मोहम्मद सामी 2004 च्या आशिया कपमध्ये ही गणितं विसरला. बांगलादेशविरुद्ध त्याने एक षटकात तब्बल 17 चेंडू टाकले. सात वाईड आणि चार नो-बॉल्स टाकून त्याने क्रिकेटच्या इतिहासात सर्वाधिक लांब षटकाचं रेकॉर्ड आपल्या नावावर केलं.
सनथ जयसूर्या
शेवटी, श्रीलंकेचा विस्फोटक सलामीवीर सनथ जयसूर्या ज्याच्या हातात बॅट आल्यावर प्रतिस्पर्धी गोलंदाज घाबरत असत, त्याच्यावरही एक अनपेक्षित रेकॉर्ड आहे. वनडे क्रिकेटमध्ये 34 वेळा तो शून्यावर बाद झाला आहे. त्याच्याकडून जशी मोठ्या खेळींची अपेक्षा असायची, तसाच अचानक ‘डक’ घेण्याचाही धोका असायचा.
