जग खूप मोठं आहे, आणि त्यातील प्रत्येक कोपरा काही ना काही विस्मयकारक गोष्ट लपवून ठेवतो. अनेकवेळा आपल्याला वाटतं की आपण जगाचं खूप पाहिलं, समजून घेतलं… पण मग अशी काही गावे आपल्या समोर येतात की आपण चकित होतो. या गावांचे नियम, जीवनशैली, तसेच लोकांची जीवनपद्धती इतकी वेगळी आहे की प्रत्येकाची कथा आपल्याला थक्क करते. आज आपण अशाच पाच अनोख्या गावांच्या गोष्टी जाणून घेणार आहोत, ज्यांची वेगळेपणाची ओळख संपूर्ण जगात आहे.
‘कुंग-फू विलेज’
चीनमधील एक गाव आहे जिथे कुंग-फू हा खेळ किंवा कला नसून जीवनाचा अविभाज्य भाग आहे. तियानझू नावाच्या या गावात लहानांपासून मोठ्यांपर्यंत प्रत्येकाला कुंग-फू येतं. ही लढाऊ कला इतकी खोलवर रुजली आहे की गावकऱ्यांची शिस्त पाहून कोणीही भारावून जाईल. येथे कुंग-फू शिकवणं ही परंपरा आहे, आणि यामुळेच हे गाव ‘कुंग-फू विलेज’ म्हणून ओळखलं जातं.
‘किडनी व्हिलेज’
नेपाळमधील होक्से नावाचं गाव मात्र याच्या अगदी उलट आणि दुःखद कहाणी सांगतं. येथे बहुतांश लोकांकडे फक्त एकच किडनी आहे. कारण? गरिबी आणि लालसेच्या विळख्यात अडकलेले अनेक गावकरी त्यांच्या किडन्या विकून बसले. त्यांना खोटं सांगितलं गेलं की किडनी पुन्हा वाढते, आणि पैशांच्या मोहात त्यांनी आपले आरोग्य गमावलं. आज या गावाला ‘किडनी व्हिलेज’ म्हणून ओळखलं जातं आणि हे नाव ऐकूनच मनात विषण्णता येते.
विगनेला गाव
इटलीच्या मिलान शहराजवळ वसलेलं विगनेला नावाचं एक छोटे गाव अजून एका अनोख्या कारणासाठी प्रसिद्ध आहे. या गावात दरवर्षी हिवाळ्यात तीन महिने सूर्यप्रकाश पोहोचत नाही. पर्वतरांगांच्या सावलीत पूर्ण गाव झाकोळलेलं राहतं. पण गावकऱ्यांनी हार मानली नाही. त्यांनी टेकडीवर मोठा आरसा लावला, जो सूर्यप्रकाश परावर्तित करून गावात पाठवतो.यामुळे हे गाव कायम चर्चेत असते.
जुजकार गाव
स्पेनमधलं जुजकार हे गाव पाहिलं तर एखाद्या परीकथेतील गावासारखं वाटतं. या गावातील प्रत्येक घर निळ्या रंगात रंगवलं गेलं आहे. हे सर्व काही एका थ्रीडी अॅनिमेशन चित्रपटाच्या शूटिंगमुळे सुरू झालं. एकदा काही घरे निळ्या रंगात रंगवली गेली आणि मग संपूर्ण गावाने हे रूप स्वीकारलं. आता हे गाव पर्यटकांसाठी एक आकर्षण बनलं आहे.
गिथूर्न गाव
शेवटी एक अशा गावाची गोष्ट जी वाहन, रस्ते या संकल्पनांपासून खूप दूर आहे. नेदरलँडमधील गिथूर्न या गावात एकही रस्ता नाही. इथे वाहन नाहीत, गडगडाट नाही, हॉर्न नाही. फक्त पाण्याचे अरुंद मार्ग आहेत आणि बोटी आहेत. गावकरी एकमेकांपर्यंत पोहोचण्यासाठी बोटीतून प्रवास करतात. इथे संपूर्ण जीवन जलमार्गावर वाहतं. या शांत गावात गेल्यावर वेळच थांबला आहे असं वाटतं.
या पाच गावांच्या गोष्टी ऐकून असं लक्षात येतं की जगभरात किती विविधता आहे. कुठे परंपरा आणि कला जपली गेली आहे, तर कुठे गरिबीमुळे जीवनच बदलून गेलं आहे. कुठे निसर्ग अडचण ठरतोय, तर कुठे रंग आणि कल्पनाशक्ती नवे जग निर्माण करत आहेत. ही गावे आपल्या या वैशिष्ट्यांमुळे कायम चर्चेत असतात.
