आपण कधी विचार केला आहे का, काही लोक आपल्याला अगदी पहिल्या भेटीत इतके आपलेसे का वाटतात? अगदी अनोळखी असूनही त्यांच्याशी बोलताना मन हलकं वाटतं? ते ऐकतात, समजून घेतात आणि लगेच आपल्याला स्वीकारतात. या लोकांच्या स्वभावामागे केवळ संस्कार नाहीत, तर त्यांच्या जन्मतारखेमागील अंकशास्त्रीय रहस्य लपलेलं असतं. विशेषतः जर त्यांचा मूलांक 2 असेल तर.
मूलांक 2
अंकशास्त्रानुसार, एखाद्या व्यक्तीच्या जीवनात आलेल्या प्रत्येक अंकाला एक विशिष्ट अर्थ असतो. ही संख्या त्या व्यक्तीच्या स्वभावापासून ते त्याच्या विचारशक्तीपर्यंत अनेक पैलूंवर प्रभाव टाकते. मूलांक 2 असलेले लोक म्हणजेच 2, 11, 20 किंवा 29 तारखेला जन्मलेले लोक हे या विश्लेषणाचे सर्वोत्तम उदाहरण आहेत. त्यांच्यावर चंद्राचा प्रभाव असल्यामुळे त्यांचे व्यक्तिमत्त्व हे सौम्य, भावनिक आणि अंतर्मुख असते.
या लोकांचे सर्वात मोठे वैशिष्ट्य म्हणजे त्यांना इतरांची मन:स्थिती सहज समजते. त्यांच्या मनामध्ये खोल भावनांचा महासागर असतो, पण ते नेहमी शांत आणि स्थिर राहतात. म्हणूनच अगदी अपरिचित लोकही त्यांच्या जवळ जाऊन मनातील सगळं ओतून टाकतात. ते ऐकतात, समजून घेतात. त्यांचा सहज आणि दयाळू स्वभाव एखाद्या थकलेल्या मनाला हळूवार उब देतो.
यांचं अंतर्ज्ञान हे इतकं तीव्र असतं की कोणतीही गोष्ट घडायच्या आधीच ते त्याची जाणीव करून देतात. त्यामुळेच हे लोक उत्तम सल्लागार सिद्ध होतात, वैयक्तिक नातेसंबंध असो की जीवनातील महत्त्वाचे निर्णय. त्यांचा सल्ला कोणत्याही पुस्तकात सापडणार नाही, कारण तो त्यांच्या अनुभवातून आणि भावना समजून घेण्याच्या शक्तीतून निर्माण होतो.
दिसायला असतात आकर्षक
दिसायला हे लोक आकर्षक असतात, पण त्यांचं खऱ्या अर्थानं सौंदर्य त्यांच्या स्वच्छ आणि निर्मळ अंत:करणात असतं. त्यांचं हे शुद्ध मन आणि स्पष्ट आभा लोकांना त्यांच्या दिशेनं खेचून नेतं. त्यामुळेच अगदी अडचणीत सापडलेली माणसेही त्यांच्याशी संवाद साधतात आणि न बोलता खूप काही सांगून जातात.
अशा प्रकारचे व्यक्तिमत्त्व आपल्याला आयुष्यात फार क्वचितच भेटते. जर तुम्ही अशा व्यक्तीला ओळखत असाल, तर नशिबवान आहात.
