युरोपच्या नकाशावर एखाद्या बिंदूप्रमाणे दिसणारा, पण संपूर्ण जगाच्या अर्थव्यवस्थेवर ठसा उमटवणारा देश म्हणजे लक्झेंबर्ग. क्षेत्रफळाने लहान आणि लोकसंख्येने माफक असलेला हा देश जगातील सर्वात श्रीमंत देशांपैकी एक आहे. इथली जीवनशैली, आर्थिक स्थैर्य आणि सामाजिक सुविधा पाहिल्यावर कोणालाही थक्क व्हायला होते. आणि हो, येथे माणसाचे मूलभूत हक्क केवळ कागदावरच नाहीत, तर ते रोजच्या आयुष्यात जगले जातात.
लक्झेंबर्ग देश
दरडोई उत्पन्नाच्या बाबतीत लक्झेंबर्गचा उल्लेख नेहमीच आदराने होतो. एका व्यक्तीचे सरासरी वार्षिक उत्पन्न येथे सुमारे 1.5 कोटी रुपये असल्याचे आकडे सांगतात. ही केवळ संपत्ती नाही, तर ती एक समृद्ध संस्कृती, नीटनेटकी आर्थिक नीती आणि सुशिक्षित नागरिकांचा परिणाम आहे. देशाची लोकसंख्या केवळ 6.5 लाख असूनही, त्याचे योगदान आंतरराष्ट्रीय अर्थजगतात मोठ्या देशांइतके महत्त्वाचे आहे.
लक्झेंबर्गची अर्थव्यवस्था प्रामुख्याने वित्तीय सेवा, गुंतवणूक व्यवस्थापन आणि बँकिंग क्षेत्रावर आधारलेली आहे. जगभरातील अनेक मोठ्या कंपन्या येथे आपली कार्यालयं उघडतात, कारण इथे कर दर खूपच कमी आहेत. कंपन्यांसाठी अनुकूल वातावरण, अत्यंत स्थिर राजकारण आणि मजबूत कायदे हे लक्झेंबर्गचे विशेष ओळखचिन्ह आहेत. त्यामुळेच हा देश जगभरातील व्यावसायिकांना आणि गुंतवणूकदारांना आकर्षित करतो.
मोफत मूलभूत सुविधा
या समृद्ध देशात माणसाला मिळणाऱ्या मूलभूत सुविधा ऐकून आश्चर्य वाटते. इथे बस, ट्रेन या सर्व सार्वजनिक वाहतूक सुविधा पूर्णपणे मोफत आहे म्हणजेच कुठलाही तिकीट नाही, कुठलाही खर्च नाही. ही सुविधा पर्यावरण रक्षणासाठी आणि नागरिकांच्या सोयीसाठी देण्यात आली आहे. त्यामुळे इथले लोक वाहनांच्या गर्दीत अडकत नाहीत आणि प्रदूषणही कमी होते.
शिक्षणाचा विषय निघाला तर इथले धोरण आणखी आदर्श वाटते. शाळांपासून उच्च शिक्षणापर्यंत सर्व काही मोफत, किंवा अत्यंत नाममात्र शुल्कात दिले जाते. यामुळे कोणतीही कौटुंबिक पार्श्वभूमी असलेली व्यक्ती शिक्षणातून पुढे जाऊ शकते, आणि आपले आयुष्य उभारू शकते.
पण हे सगळं फक्त आर्थिकदृष्ट्या नव्हे तर सामाजिक दृष्टिकोनातूनही महत्त्वाचं आहे. लक्झेंबर्गमध्ये गुन्हेगारीचे प्रमाण अत्यंत कमी आहे. रस्ते, सार्वजनिक ठिकाणं स्वच्छ असतात, आणि नागरिकांमध्ये सौहार्द असते. इथे जीवनाची गुणवत्ता एवढी उंच आहे की जगभरातून लोक इथे स्थायिक होण्याचे स्वप्न पाहतात.
