श्रावण महिन्याचे आगमन झालं की संपूर्ण भारतात भक्तिभावाचं वातावरण तयार होतं. भोलेनाथाचे भक्त या महिन्यात विशेषत: सोमवारच्या दिवशी शिवमंदिरात गर्दी करतात. कारण या काळात भोलेनाथ प्रसन्न होण्यासाठी छोटीशी कृतीही मोठं फळ देऊ शकते, असं मानलं जातं. यावर्षी श्रावणचा पहिला सोमवार अत्यंत शुभ मानला जात असून, आजच्या दिवशी जर तुम्ही एक विशिष्ट विधी केला, तर नशीब फळण्याची शक्यता अनेक पटींनी वाढते. हा विधी म्हणजे शिवलिंगावर चंदन लावणे. पण चंदन लावायचंही एक ठराविक तंत्र आहे, जे योग्य पद्धतीनं केल्यास आर्थिक, कौटुंबिक आणि आध्यात्मिक आयुष्यात सकारात्मकता येऊ शकते.
शिवलिंगावर चंदन लावण्याची परंपरा प्राचीन काळापासून चालत आली आहे. चंदनाचा गारवा, त्याचा शुद्ध सुगंध आणि त्यामागचा आध्यात्मिक हेतू यामुळेच या विधीला अनन्यसाधारण महत्त्व आहे. चंदन लावताना जर तुम्ही ते योग्य ठिकाणी लावलंत, तर त्या-त्या भागाशी संबंधित शुभ परिणाम तुमच्या जीवनात दिसून येतात.
उजव्या बाजूस
सर्वप्रथम, शिवलिंगाच्या उजव्या बाजूस, जिथे जलाधारी आहे, तिथे चंदन लावलं जातं. या जागेला गणपतीचं स्थान मानलं जातं आणि यामुळे घरातील आर्थिक अडचणी दूर होतात, संपत्तीची वृद्धी होते. त्यानंतर, गणेशाच्या विरुद्ध दिशेला, जिथे कार्तिकेयाचं स्थान आहे, तिथे चंदन लावणं संततीप्राप्तीसाठी लाभदायक ठरतं. या विधीला विशेष महत्त्व आहे, कारण अनेक दांपत्य या आशेने भोलेनाथाकडे याचना करतात.
अशोक सुंदरीचं स्थान
तिसरं महत्त्वाचं स्थान आहे अशोक सुंदरीचं, भगवान शंकर आणि पार्वतीची कन्या. शिवलिंगातून वाहणाऱ्या पाण्याच्या मार्गावर चंदन लावल्यानं विवाहयोग्य युवक-युवतींसाठी योग्य जीवनसाथी मिळण्याची शक्यता वाढते. पुढे, शिवलिंगाच्या जलाधारीवर जिथून पाणी बाहेर पडतं – तिथे चंदनाचा लेप लावल्यास जीवनातील अडथळे कमी होतात आणि मानसिक शांती मिळते.
शिवलिंगाच्या मागील बाजूस आणि नंदीचे मस्तक
शिवलिंगाच्या मागील बाजूसही चंदन लावणं श्रेयस्कर मानलं जातं. ही जागा तुलनेने दुर्लक्षित राहते, पण इथं केलेला चंदनाचा टिळक राग, असंतोष, आत्मगौरव आणि कर्मबाधा यापासून मुक्ती देतो. अखेरीस, नंदीच्या मस्तकावर चंदन लावणं म्हणजे भोलेनाथपर्यंत तुमच्या प्रार्थनेचा संदेश पोहोचवण्यासारखं आहे. नंदी म्हणजे भक्तीचा सर्वोच्च प्रतीक आणि त्याच्यावर चंदन लावल्याने तुमच्या जीवनातील चिंता दूर होतात, आणि आंतरिक स्थैर्य प्राप्त होतं.
श्रावण महिन्यात हे सात चंदनाचे स्पर्श म्हणजे फक्त एक धार्मिक विधी नाही, तर मन, शरीर आणि आत्म्याचं शुद्धीकरण आहे. या छोट्याशा परंपरेमधून जर आपण आस्था, श्रद्धा आणि प्रेमाने सहभागी झालो, तर भोलेनाथ नक्कीच आपल्या जीवनात कृपा बरसवतील.
