केरळच्या डोंगरात लपलेलं ‘हे’ ठिकाण पाहण्यासाठी जगभरातून पर्यटक करतात गर्दी, असं काय खास आहे या ठिकाणी? जाणून घ्या!

केरळ राज्याने निसर्गसंपन्नतेसोबतच सांस्कृतिक ठेवा आणि पौराणिक इतिहास यांचं अनोखं मिश्रण जपलं आहे. या सगळ्याचा भव्य आणि विस्मयकारक अनुभव मिळतो तो जटायु अर्थ सेंटर येथे. हे केंद्र केवळ भारतात नव्हे, तर संपूर्ण जगात प्रसिद्ध आहे, कारण येथे आहे जगातील सर्वात मोठी पक्ष्याची मूर्ती. ही भव्य मूर्ती पाहण्यासाठी देशी आणि परदेशी पर्यटक मोठ्या संख्येने केरळच्या कोल्लम जिल्ह्यात येतात.

जटायु अर्थ सेंटर

जटायु अर्थ सेंटर हे केरळच्या कोल्लम जिल्ह्यातील चडयमंगलम भागात वसलेले आहे. या ठिकाणाची संकल्पना रामायणातील प्रसंगावर आधारित आहे. रामायणात जटायु नावाच्या विशाल पक्ष्याने माता सीतेचे रावणापासून रक्षण करण्याचा प्रयत्न केला होता. युद्धादरम्यान रावणाने त्याचे पंख छाटले आणि तो याच ठिकाणी खाली कोसळला, असं मानलं जातं. म्हणूनच या जागेचं ऐतिहासिक आणि धार्मिक महत्त्व देखील फार मोठं आहे.

येथील जटायुची मूर्ती अतिशय भव्य आहे. ती 200 फूट लांब, 150 फूट रुंद आणि 70 फूट उंच आहे. ही मूर्ती एकूण 65 एकर जागेवर वसवलेली आहे आणि ती चार टेकड्यांवर पसरलेली आहे. ही जागा समुद्रसपाटीपासून 350 मीटर उंचीवर असल्यामुळे येथे उभं राहिल्यावर आजूबाजूचं निसर्गसौंदर्यही मन मोहवून टाकतं.

हे केंद्र केवळ ऐतिहासिक स्मारक नाही, तर साहसी पर्यटकांसाठीही एक खास जागा आहे. येथे रॉक क्लायंबिंग, रॅपलिंग, झिपलाइन, पेंटबॉल, आणि इतर अनेक अ‍ॅडव्हेंचर अ‍ॅक्टिव्हिटीज उपलब्ध आहेत. त्यामुळे निसर्गप्रेमींसोबतच साहसप्रिय लोकांसाठीही हे एक आदर्श पर्यटनस्थळ ठरतं.

प्रवेश शुल्क आणि सुविधा

जटायु अर्थ सेंटरमध्ये प्रवेश करण्यासाठी पर्यटकांना प्रवेश शुल्क भरावं लागतं. मूळ केंद्राशिवाय येथे रोपवे सुविधा, डिजिटल म्युझियम, मल्टिमिडीया शो आणि रामायणातील जटायुचा संघर्ष दाखवणारे विशेष सादरीकरणही पाहायला मिळते.

या मूर्तीच्या परिसरातच ‘जटायुपर’ नावाचं ठिकाण आहे. इथेच जटायुने आपले पंख गमावले, अशी मान्यता आहे. त्यामुळे या जागेला पवित्रतेचं आणि वीरतेचं प्रतीक मानलं जातं. हे केंद्र नुसतं पाहण्यासारखं नसून ते भारतीय संस्कृती, पुराणकथा, निसर्गसौंदर्य आणि साहसाचं संगमस्थान आहे. त्यामुळे केरळमध्ये पर्यटनासाठी जाणाऱ्यांनी या ठिकाणाची एकदातरी भेट नक्की द्यावी.