भारतीय SUV बाजार सध्या जबरदस्त स्पर्धेचा बनला आहे. महिंद्रा XUV700 आणि टाटा सफारीसारख्या लोकप्रिय मॉडेल्सने मोठ्या प्रमाणात ग्राहकांची मनं जिंकली आहेत. अशा वेळी, जर टोयोटासारख्या विश्वासार्ह ब्रँडने इनोव्हा नावाने एक मजबूत SUV भारतीय बाजारात आणली, तर ती नक्कीच मोठी क्रांती ठरू शकते.
कशी असेल टोयोटाची नवी SUV?
टोयोटा हे नाव विश्वास, टिकाऊपणा आणि दीर्घकालीन कामगिरीसाठी ओळखले जाते. इनोव्हा आणि फॉर्च्युनर या दोन्ही गाड्यांनी भारतीय ग्राहकांच्या मनात आपले खास स्थान निर्माण केले आहे. पण इनोव्हा हायक्रॉस ही मुख्यतः एक एमपीव्ही आहे, तर फॉर्च्युनर प्रीमियम एसयूव्ही सेगमेंटमध्ये मोडते. अशात जर टोयोटाने डी-सेगमेंटमध्ये एसयूव्ही लाँच केली तर एसयूव्ही चांगली कामगिरी करेल अशी शक्यता आहे.
जर टोयोटाने हिलक्स रंगगा (IMV 0) प्लॅटफॉर्मवर आधारित एक SUV सादर केली, जी 5-सीटर किंवा 7-सीटर पर्यायांसह येईल, तर ती एक मजबूत आणि बहुउद्देशीय SUV ठरेल. हिलक्सच्या प्लॅटफॉर्मचा उल्लेख म्हणजे ही SUV ऑफ-रोड क्षमतांसह दमदार डिझाइन, जबरदस्त टिकाऊपणा आणि विश्वसनीय इंजिनसह येऊ शकते. भारतीय ग्राहकाला नेमके हेच हवे असते.
हायब्रिड इंजिनसह टोयोटा करणार धमाल?
महिंद्रा XUV700 ही सध्या सेगमेंटमध्ये सर्वाधिक विकली जाणारी SUV आहे. तिला पॉवरट्रेन पर्याय, अॅडव्हान्स फीचर्स आणि किफायतशीर किंमत यामुळे मोठा प्रतिसाद मिळतो आहे. जर टोयोटा इनोव्हा नावाने एक SUV लाँच करत असेल, आणि त्यात हायब्रिड पॉवरट्रेन देत असेल, तर ती या स्पर्धेत एक महत्त्वाची ठरू शकते. सध्या D-सेगमेंटमध्ये कोणतीही SUV हायब्रिड इंजिनसह येत नाही. जर टोयोटाने हे पाऊल उचलले, तर इंधन कार्यक्षमतेच्या बाबतीत ती इतरांवर मात करू शकते.
टोयोटाचे वाहन नेहमी टिकाऊ आणि दीर्घायुषी असतात हे सर्वांनाच ठाऊक आहे. इनोव्हा आणि फॉर्च्युनरसारख्या मॉडेल्स लाखो किलोमीटर चालूनही अजून रस्त्यावर आहेत. जर नवीन SUV त्याच विश्वसनीयतेसह, आधुनिक डिझाइन, हायब्रिड इंजिन आणि स्मार्ट फीचर्ससह आली, तर ग्राहकांमध्ये ती झपाट्याने लोकप्रिय होईल.
