दैनंदिन जेवणाचा वेळ हा फक्त शरीराला ऊर्जा देण्यासाठी नसतो, तर तो आपल्या मनःशांतीचा आणि नातेसंबंधांचा आधारही असतो. सध्याच्या धकाधकीच्या जीवनशैलीत, अनेकांना जेवताना मोबाईलवर स्क्रोल करणे किंवा टीव्हीसमोर बसून खाणे हे अगदीच सामान्य वाटते. काहींसाठी हा दिवसाचा एकमेव विरंगुळ्याचा क्षण असतो, तर काहींसाठी हा सवयीचा भाग बनलेला असतो. पण या सवयीमुळे आपल्या आयुष्यात नकळत अशा काही गोष्टी घडत असतात, ज्या पुढे जाऊन मोठ्या अडचणी निर्माण करू शकतात.
वास्तुशास्त्र सांगते की अन्न खाण्याचा क्षण हा पवित्र मानला जातो. या काळात केवळ शरीरच नाही, तर मन आणि आत्माही त्या अन्नातून पोषण घेत असतो. म्हणूनच जेवण करताना मन एकाग्र ठेवणे, शांततेने खाणे आणि कृतज्ञतेची भावना मनात ठेवणे महत्त्वाचे मानले जाते. परंतु जेव्हा आपण स्क्रीनकडे डोळे लावून बसतो, तेव्हा आपण त्या अन्नाच्या ऊर्जेला, त्याच्या परिणामांना दुर्लक्षित करतो. अन्न योग्य पद्धतीने न पचल्याने शरीरावर परिणाम होतो, पचनक्रिया बिघडते आणि एकूणच आरोग्यावर वाईट परिणाम होतो.
नकारात्मक उर्जेचा संचय
या सवयीचा आणखी एक गंभीर परिणाम म्हणजे आपल्या घरातल्या ऊर्जेवर होणारा नकारात्मक प्रभाव. मोबाईल किंवा टीव्हीमधून सतत निघणाऱ्या इलेक्ट्रॉनिक लहरी आणि निळ्या प्रकाशामुळे घरातली सकारात्मक ऊर्जा अडथळलेली जाते. याचा परिणाम एकट्या शरीरापुरताच मर्यादित राहत नाही, तर तो घरातील वातावरणावरही होतो. व्यक्तीची एकाग्रता कमी होते, विचार करण्याची स्पष्टता कमी होते आणि हे नकळतपणे मानसिक थकवा निर्माण करू शकते.
आर्थिक स्थैर्य हरवते
यासोबतच आर्थिक स्थैर्याचाही संबंध या सवयीशी जोडला जातो. वास्तुशास्त्रानुसार, जेवताना जर मन शांत नसेल, देवाच्या कृपेची आठवण नसेल, तर लक्ष्मीची कृपा मिळत नाही. त्यामुळे पैशाचे नुकसान, खर्चाची वाढ किंवा आर्थिक अपयश यासारख्या अडचणींचा सामना करावा लागतो. फक्त पचनक्रिया नाही, तर आर्थिक स्थैर्य सुद्धा अशा छोट्याछोट्या कृतींवर अवलंबून असते, हे आपल्या लक्षात येत नाही.
नातेसबंध बिघडतात
सगळ्यात महत्त्वाचे म्हणजे, जेवताना मोबाईल आणि टीव्हीमध्ये गुंतल्याने आपण आपले नातेसंबंध दूर लोटतो. एकत्र जेवण ही फक्त एक परंपरा नाही, तर ती संवादाची, प्रेमाची आणि आपुलकीची जागा असते. पण जर घरात प्रत्येकजण आपापल्या स्क्रीनमध्ये बुडालेला असेल, तर नात्यांमध्ये दूरत्व वाढते, एकमेकांच्या भावना ऐकण्याची, समजून घेण्याची संधीच हरवते.
म्हणूनच, जेवणाचा काळ हा फक्त शरीर पोसण्यासाठी न मानता, तो मन, आत्मा आणि कुटुंब या सगळ्यांना एकत्र जोडणारा क्षण मानला पाहिजे. मोबाईल किंवा टीव्हीपासून दूर राहून एकमेकांशी मनमोकळ्या गप्पा मारताना घेतलेले जेवण हे आरोग्य, संपत्ती आणि सौख्य या तिन्हींचा खरा मंत्र ठरू शकते.
