आजचा काळ म्हणजे वेगवान तंत्रज्ञानाचा, आणि त्यात महिलांसाठी प्रवास करणं जितकं सोपं झालं आहे, तितकंच ते आव्हानात्मकही बनलं आहे. ओला, उबर किंवा रॅपिडोसारख्या अॅप्समुळे शहराच्या एका टोकापासून दुसऱ्या टोकापर्यंत पोहोचणं अगदी सहज झालं आहे. पण सोयीच्या या प्रवासामागे काही वेळा असुरक्षिततेची सावलीही उभी राहते. विशेषतः महिलांसाठी, जेव्हा रात्री एकटं प्रवास करावं लागतं, तेव्हा मनात अनेक शंका-कुशंका निर्माण होतात. अशा वेळी, या अॅप्समध्ये उपलब्ध असलेली सुरक्षा वैशिष्ट्ये आपल्या मदतीला येऊ शकतात, जर ती वेळेवर आणि योग्य प्रकारे वापरली गेली तर.
प्रवास सुरू करण्याआधीच काही साध्या गोष्टी तपासून पाहिल्या तर अनेक त्रास टाळता येऊ शकतात. अॅपमध्ये दाखवलेला गाडीचा नंबर, ड्रायव्हरचं नाव आणि चेहरा हे प्रत्यक्षात आलेल्या ड्रायव्हरशी जुळतात का, हे एकदा तपासून घ्या. हे वाटायला कितीही साधं वाटलं, तरी विशेषतः रात्रीच्या वेळी, अशा तपासण्या तुमचं संरक्षण करण्यासाठी खूप उपयोगी ठरू शकतात.
सेफ्टी बटण
अनेक महिलांना माहीतही नसतं की ओला आणि उबरमध्ये सेफ्टी बटण नावाचं एक महत्त्वाचं फीचर असतं. प्रवासादरम्यान जर काही विचित्र वाटलं, तर या बटणावर एकच क्लिक करून तुम्ही पोलिसांपर्यंत किंवा आपत्कालीन सेवांपर्यंत पोहोचू शकता, आणि तेही कुठलाही नंबर लक्षात ठेवायची गरज न ठेवता. हे बटण क्वचितच कुणी वापरतं, पण ते वेळेवर खूप मोठी मदत करू शकतं.
ऑडिओ रेकॉर्डिंग
कधी कधी, प्रवासादरम्यान काही विचित्र गोष्टी घडतात, पण त्यांचा आरडाओरडा न करता शांतपणे नोंद ठेवणं गरजेचं असतं. अशा वेळी ऑडिओ रेकॉर्डिंग फिचर तुमच्यासाठी कवचासारखं ठरू शकतं. अॅपमध्येच असलेलं हे फीचर वापरून, कोणत्याही आवाजाशिवाय तुम्ही संभाषणाची किंवा परिस्थितीची नोंद करू शकता, जे पुढे पुरावा म्हणून कामी येऊ शकतं.
लोकेशन शेअर करा
प्रवास करताना तुमचं लोकेशन तुमच्या विश्वासू व्यक्तीशी शेअर करणं ही अजून एक सवय असायला हवी. ओला, उबर आणि रॅपिडो या तिन्ही अॅप्समध्ये हे शक्य आहे. एका क्लिकवर तुम्ही तुमचा लाईव्ह लोकेशन पाठवू शकता, जेणेकरून तुमचे घरचे किंवा मित्र तुमच्या हालचालींवर लक्ष ठेवू शकतील. या सवयीमुळे अनेक संकटं टाळता येऊ शकतात.
ट्रिप शेअर फिचर
ट्रिप शेअर फिचर हे तर आजच्या काळात एक वरदानच आहे. प्रवासाची सुरुवात, ड्रायव्हरची माहिती, गाडीचा रूट हे सगळं एकाच लिंकमधून तुमच्या जवळच्या व्यक्तीपर्यंत पोहोचवता येतं. त्यामुळे जर काही गडबड झालीच, तरी मदत लवकर मिळू शकते.
तुम्हाला ड्रायव्हरची वागणूक चुकत असल्यासारखी वाटली, तर अॅपमध्ये त्वरित तक्रार करण्याची सुविधा आहे. काहीजण विचार करतात की त्याचा उपयोग होत नाही, पण खरं सांगायचं तर, कंपन्या या तक्रारी गांभीर्याने घेतात आणि अनेकदा योग्य ती कारवाईही करतात. तुमची प्रतिक्रिया इतर प्रवाश्यांच्या सुरक्षिततेसाठीही महत्त्वाची ठरते.
