भारतात फॅक्टरी आउटलेटमध्ये ब्रँडेड वस्तू अर्ध्या किमतीत मिळतात, हे पाहून अनेकदा आश्चर्य वाटतं. एकाच ब्रँडच्या शोरूममध्ये तीच वस्तू हजारोंमध्ये मिळते आणि आउटलेटमध्ये तीच गोष्ट अक्षरशः निम्म्या किमतीत. यात फक्त सवलतीच नव्हे, तर अनेक आर्थिक, व्यावसायिक आणि वितरणाशी संबंधित कारणे लपलेली असतात.
फॅक्टरी आउटलेट म्हणजे काय?
फॅक्टरी आउटलेट म्हणजे मुख्यत्वे स्टॉक क्लिअरन्ससाठी तयार केलेली विक्री जागा. जेव्हा हंगाम बदलतो, ट्रेंड बदलतो किंवा नवीन कलेक्शन बाजारात येतं, तेव्हा जुन्या मालाला ठिकाण मिळवून देणं गरजेचं होतं. याच उद्देशाने ब्रँड्स त्यांच्या शिल्लक उत्पादनांच्या विक्रीसाठी ‘फॅक्टरी आउटलेट्स’ या माध्यमाचा वापर करतात. त्यामुळे त्यात घाऊक विक्रेत्यांचा खर्च, वाहतूक, वितरण व इतर मध्यस्थांची फी वाचते. हीच बचत थेट ग्राहकांपर्यंत पोहोचवली जाते.
कधी कधी अशा वस्तूंमध्ये फार किरकोळ दोष असतो, जसं की हलकं स्टिचिंग चुकणं, टॅगचा अभाव किंवा इतर सौंदर्यदृष्ट्या लहानशा चुका. या त्रुटी उत्पादनाच्या कार्यक्षमतेवर परिणाम करत नाहीत, पण शोरूमच्या स्टँडर्डमध्ये बसत नाहीत. त्यामुळे अशा वस्तू अर्ध्या किमतीत फॅक्टरी आउटलेटमध्ये पाठवल्या जातात.
फॅक्टरी आउटलेट्स अनेकदा शहराच्या बाहेरील भागात, कमी भाड्याच्या परिसरात असतात. मॉल किंवा प्रीमियम स्टोअर्सप्रमाणे त्यांच्या ठिकाणी आलिशान डेकोर, भारी मार्केटिंग किंवा मोठा स्टाफ नसतो. त्यामुळे त्यांचा चालू खर्च तुलनेत खूपच कमी असतो, जो पुन्हा वस्तूच्या किमतीवर सकारात्मक परिणाम करतो.
खरेदी करताना ‘हे’ लक्षात ठेवा
आणखी एक महत्त्वाचा मुद्दा म्हणजे काही ब्रँड्स फक्त फॅक्टरी आउटलेटसाठी खास कमी दर्जाच्या वस्तू तयार करतात. त्या दिसायला ब्रँडेड असतात, पण त्यात वापरलेलं कापड, डिझाइन किंवा फिनिशिंग थोडं कमी दर्जाचं असतं. त्यामुळे जर आपण केवळ “ब्रँड”च्या नावाने वस्तू घेत असाल, तर ही बाब लक्षात ठेवणं गरजेचं आहे.
खरेदी करताना वस्तू नीट तपासणं महत्त्वाचं आहे. शिवणकाम, झिप, टॅग, लेबल्स आणि फॅब्रिक चांगलं आहे का हे पाहा. आणि सर्वात महत्त्वाचं म्हणजे फॅक्टरी आउटलेटमध्ये अनेकदा परताव्याची सुविधा फारच मर्यादित असते, त्यामुळे निर्णय घेण्याआधी खात्री करून घेणं आवश्यक आहे.
