Ahmednagar Breaking : येत्या काही महिन्यात देशात लोकसभेच्या सार्वत्रिक निवडणुका होणार आहेत. यानंतर महाराष्ट्रात पुन्हा विधानसभेच्या देखील निवडणूक रंगणार आहेत. त्यामुळे देशाच्या इतर राज्यांपेक्षा महाराष्ट्रात आगामी निवडणुकांच्या पार्श्वभूमीवर अधिकची तयारी सुरू आहे.
लोकसभा आणि विधानसभा या दोन्ही निवडणुका डोळ्यापुढे ठेवून आता राजकीय पक्षांनी कंबर कसली असून सर्वसामान्यांमध्ये जनसंपर्क वाढवण्यासाठी राजकीय नेते आता मैदानात उतरले आहेत. अहमदनगरमध्ये देखील आगामी निवडणुकांच्या पार्श्वभूमीवर वातावरण पूर्णपणे टाईट झाले आहे.
राजकीय पक्ष लोकसभेसाठी आणि विधानसभेसाठी उमेदवार निश्चित करण्यात व्यस्त आहेत तर इच्छुक उमेदवारांनी देखील आता आगामी निवडणुकांसाठी शड्डू ठोकला आहे. काही इच्छुकांनी तर आपल्या स्वपक्षाविरोधातच आवाज बुलंद केला आहे.
अशा या गरमागरमीच्या वातावरणात मात्र अहमदनगर झेडपीचे माजी उपाध्यक्ष सुजित झावरे पाटील हे वेगळ्याच कारणाने पुन्हा एकदा चर्चेत आले आहेत. ते म्हणजे झावरे पाटील आता रुपेरी पडद्यावर झळकणार आहेत.
मिळालेल्या माहितीनुसार, झावरे पाटील हे कांदा-पोहे या चित्रपटात एक छोटासा रोल निभावणार आहेत. याची शूटिंग देखील नुकतीच पूर्ण झाली आहे. यावेळी त्यांनी प्रसारमाध्यमांशी सुद्धा संवाद साधला होता.
दरम्यान कांदा-पोहे चित्रपटात झावरे पाटील आमदारांच्या भूमिकेत झळकणार आहेत. यामुळे या चित्रपटाची नगरमध्ये मोठी चर्चा रंगू लागली आहे. या चित्रपटाचे चित्रीकरण वासुंदे येथे पार पडले आहे.
झावरे पाटील यांचे बंधू सुदेश यांनी या चित्रपटाची निर्मिती केली आहे. हा चित्रपट सामाजिक संदेश देणार आहे. या चित्रपटात आमदार एका लावणीच्या कार्यक्रमात नारळ फोडण्यासाठी जातात. या लावणीच्या कार्यक्रमाचा नारळ त्यांच्या हस्ते फोडला जातो. दरम्यान याच सेनेचे शूटिंग वासुंदे येथे पार पडले आहे.
काय म्हटलेत माजी झेडपी उपाध्यक्ष
सुजित झावरे पाटील यांनी त्यांना विद्यार्थी दशेत असतानाच चित्रपटात अभिनय करायचा होता हे मनातली इच्छा बोलून दाखवली. ते म्हटलेत की विद्यार्थी दशेपासून रुपेरी पडद्यावर काम करण्याचे स्वप्न होतं आणि आज अखेर हे स्वप्न त्यांचं पूर्ण झालं आहे.
त्यांचे धाकटे बंधू सुदेश यांची निर्मिती असलेल्या कांदा पोहे चित्रपटात त्यांनाही संधी मिळाली आहे. विशेष म्हणजे या चित्रपटात त्यांनी कोणताही रिटेक न घेता शूटिंग पूर्ण केली. यामुळे दिग्दर्शकांना देखील त्यांच्या अभिनयाची भुरळ पडली आहे.
