शिर्डी- भारतीय जनता पक्षाच्या (भाजप) स्थापना दिवसानिमित्त आयोजित करण्यात आलेल्या कार्यक्रमात जलसंपदा मंत्री व अहमदनगर जिल्ह्याचे पालकमंत्री राधाकृष्ण विखे-पाटील यांनी कार्यकर्त्यांना आगामी स्थानिक स्वराज्य संस्थांच्या निवडणुकांसाठी “शत प्रतिशत भाजप” हे उद्दिष्ट ठेवून काम करण्याचे आवाहन केले.
बूथस्तरावर संघटन बळकट करण्यावर भर
विखे-पाटील यांनी सांगितले की, भाजपने देश आणि राज्यात विकास आणि विचारांच्या आधारावर सत्ता मिळवली आहे. याच धर्तीवर स्थानिक स्वराज्य संस्थांमध्येही भाजपची एकहाती सत्ता मिळवण्याची गरज आहे. त्यासाठी प्रत्येक कार्यकर्त्याने बूथस्तरावर संघटना अधिक बळकट करणे आवश्यक आहे.
दीड कोटी सदस्यांचा टप्पा पार
पक्षाच्या सदस्य नोंदणी अभियानात राज्यभरात दीड कोटी सदस्य नोंदवले गेले असून, त्यात शिर्डी मतदारसंघाने ७० हजार सदस्य नोंदणी करून महत्त्वपूर्ण योगदान दिले आहे. या यशाबद्दल विखे-पाटील यांनी कार्यकर्त्यांचे अभिनंदन केले.
फडणवीस यांचा कार्यकर्त्यांशी संवाद
या कार्यक्रमात मुख्यमंत्री देवेंद्र फडणवीस यांनी राज्यभरातील कार्यकर्त्यांशी दूरदृश्य प्रणालीद्वारे संवाद साधला. या संवादाचे थेट प्रक्षेपणही दाखवण्यात आले. त्यांनी कार्यकर्त्यांमध्ये निवडणुकांपूर्वीची ऊर्जा आणि उत्साह टिकवून ठेवण्याचे आवाहन केले.
वक्फ बोर्डावर टीका
माध्यमांशी संवाद साधताना विखे-पाटील यांनी वक्फ बोर्डावर आणि उद्धव ठाकरे गटावर जोरदार टीका केली. त्यांनी सांगितले की, वक्फ बोर्ड फक्त जमिनी बिल्डरांच्या घशात घालण्याचे काम करत असून, त्यातून मुस्लिम समाजाचा काहीही लाभ झालेला नाही. ठाकरे गटाच्या वर्तनामुळे त्यांना हिंदुत्ववादाचा दावा करण्याचा अधिकार नसल्याचेही ते म्हणाले.
विरोधकांवर हल्ला
विधानसभा निवडणुकीत जनतेने उध्दव ठाकरे गटाला चपराक दिल्याचा उल्लेख करताना विखे-पाटील यांनी सांगितले की, त्यांचे अस्तित्वच धोक्यात आले आहे. “कोल्हेकुई करणाऱ्याकडे भाजप लक्ष देत नाही,” असे म्हणत त्यांनी विरोधकांचा समाचार घेतला.
या कार्यक्रमास सभापती ज्ञानेश्वर गोंदकर, बाळासाहेब गाडेकर, कांचनताई मांढरे, दीपक रोहोम, शोभाताई घोरपडे, कैलास सदाफळ, मुकुंदराव सदाफळ, किरण बोराडे, अशोक पवार, साहेबराव निधाने, नितीन कापसे, नंदकुमार जेजूरकर, सुभाष वहाडणे, राजेंद्र वाबळे, सतीश बावके यांसह अनेक पदाधिकारी व कार्यकर्ते उपस्थित होते. भाजपने स्थानिक स्वराज्य संस्थांमध्येही मजबूत पकड मिळवावी यासाठी ही तयारी महत्त्वाची मानली जात आहे.
