Ahilyanagar News: अहिल्यानगर- येथे माजी खासदार डॉ. सुजय विखे पाटील यांनी आमदार संग्राम जगताप यांच्या समर्थनार्थ आयोजित सभेत हिंदुत्व आणि धर्मनिरपेक्षतेच्या मुद्द्यावरून तीव्र भाष्य केले. त्यांनी ‘व्होट जिहाद’, ‘लव्ह जिहाद’, ‘गोहत्या’ आणि ‘मंदिरांवर ताबा’ यासारख्या मुद्द्यांना केंद्रस्थानी ठेवत धर्मनिरपेक्षतेच्या संकल्पनेवर प्रश्नचिन्ह उपस्थित केले. माळीवाडा बसस्थानक चौकात छत्रपती शिवाजी महाराजांच्या पुतळ्याजवळ झालेल्या या सभेत त्यांनी हिंदूंच्या एकजुटीचे आवाहन केले आणि जगताप यांच्या हिंदुत्ववादी भूमिकेला पाठिंबा दर्शवला. या सभेला विविध संघटनांचे पदाधिकारी, स्थानिक नागरिक आणि महिलांनी मोठ्या संख्येने हजेरी लावली होती. विखे पाटील यांनी यावेळी आपणही लवकरच प्रखर हिंदुत्ववादी भूमिका घेण्यास सुरुवात करणार असल्याचे जाहीर केले, ज्यामुळे राजकीय वर्तुळात चर्चांना उधाण आले आहे.
हिंदूसाठी काम करणाराच देशावर राज करेल
अहिल्यानगर येथील राजकीय वातावरण सध्या हिंदुत्व आणि धर्मनिरपेक्षतेच्या मुद्द्यांभोवती केंद्रित झाले आहे. माजी खासदार डॉ. सुजय विखे पाटील यांनी माळीवाडा बसस्थानक चौकातील सभेत आमदार संग्राम जगताप यांच्या हिंदुत्ववादी भूमिकेचे समर्थन करताना विरोधकांवर जोरदार टीका केली. त्यांनी म्हटले की, काही लोक आमदार जगताप यांच्या विरोधात मोर्चे काढत आहेत आणि त्यांना शिवीगाळ करत आहेत, कारण त्यांच्या कार्यामुळे हिंदू समाज जागरूक होत आहे. विखे पाटील यांनी ‘व्होट जिहाद’, ‘लव्ह जिहाद’ आणि ‘गोहत्या’ यासारख्या मुद्द्यांचा उल्लेख करत विरोधकांना आव्हान दिले की, जोपर्यंत हे मुद्दे बंद होत नाहीत, तोपर्यंत धर्मनिरपेक्षतेची भाषा करणे योग्य नाही. त्यांनी पुढे सांगितले की, जगताप हे केवळ एक व्यक्ती नसून, एक विचार आहेत, आणि हिंदूंसाठी काम करणाऱ्यांनाच भविष्यात देशावर राज्य करण्याची संधी मिळेल.
संग्राम भंडारे यांचंही प्रखर भाषण
सभेला उपस्थित असलेल्या संग्राम भंडारे महाराज यांनीही याच मुद्द्यांना पाठिंबा देताना सांगितले की, आता देशात आणि राज्यात हिंदूंच्या विचारांचे सरकार आहे. त्यांनी ‘लव्ह जिहाद’, ‘लँड जिहाद’ आणि ‘व्होट जिहाद’ यासारख्या षडयंत्रांना सहन केले जाणार नाही, असे स्पष्ट केले. त्यांनी हिंदू समाजाला संघटित होण्याचे आणि जगताप यांच्या हातांना बळ देण्याचे आवाहन केले. सभेत श्रीराम संघाचे राष्ट्रीय अध्यक्ष सागर बेग, राष्ट्रप्रथम प्रतिष्ठानचे अविनाश तायडे, भाजप शहर जिल्हाध्यक्ष अनिल मोहिते, माजी उपमहापौर गणेश भोसले, राष्ट्रवादी काँग्रेसचे शहर अध्यक्ष संपत बारस्कर यांच्यासह अनेक मान्यवर उपस्थित होते. या सभेत भगव्या टोप्या परिधान केलेल्या तरुणांनी विविध फलक झळकावत शक्तिप्रदर्शन केले, आणि घोषणांनी परिसर दणाणून सोडला. सभेनंतर काही मान्यवरांनी आमदार जगताप यांच्या घरी भेट देऊन त्यांच्या वडिलांचे मासिक श्राद्ध विधी निमित्ताने अभिवादन केले.
लवकरच हिंदुत्ववादी भूमिका घेणार
डॉ. सुजय विखे पाटील यांनी या सभेत आपली भविष्यातील राजकीय दिशा स्पष्ट करताना सांगितले की, ते लवकरच जगताप यांच्यासारखी प्रखर हिंदुत्ववादी भूमिका घेण्यास सुरुवात करतील. त्यांनी आबू आझमी यांच्या वारकऱ्यांवरील वक्तव्याचा उल्लेख करताना, जगताप यांना हिंदूंच्या रक्षणासाठी बोलण्याचा पूर्ण अधिकार असल्याचे ठामपणे सांगितले. विखे पाटील यांनी आपल्या भाषणात हिंदूंच्या जमिनी सुरक्षित होत असल्याचा दावा केला आणि हिंदू समाजाला एकजुटीने जगताप यांच्या पाठीशी उभे राहण्याचे आवाहन केले.
