MNS : कसबा आणि पिंपरी चिंचवड पोट निवडणुकीत मनसेने आपला उमेदवार दिला नाही. असे असताना मनसे काय भूमिका घेणार याकडे सर्वांचे लक्ष लागले होते. आता मनसेने कसबा आणि चिंचवड पोटनिवडणुकीत भाजपला मदत करणार असल्याचे घोषित केले आहे. यामुळे यावरून राजकीय आरोप सुरू झाले आहेत.
मनसेचे नेते बाबू वागसकर यांनी ही माहिती दिली आहे. चिंचवड आणि कसबा या दोन्ही ठिकाणी मनसेची हीच भूमिका राहणार आहे. कसबा आणि चिंचवडची पोटनिवडणूक ही भाजप आणि महाविकास आघाडीसाठी प्रतिष्ठेची बनली आहे.
या निवडणुकीमध्ये भाजपला मदत करण्याचा आदेश मनसे अध्यक्ष राज ठाकरे यांनी दिला असल्याची माहिती मनसेच्या नेत्यांनी दिली. यामुळे आता येणाऱ्या काळात देखील मनसेची भाजपसोबत युती होणार का असा प्रश्न अनेकांना पडला आहे.
दरम्यान, पोटनिवडणुकीमध्ये भाजपच्या प्रचारात मनसे सहभागी होणार नाही. मात्र, मनसे मतदानामध्ये भाजपला मदत करणार असल्याची चर्चा मनसे आणि भाजपच्या वरिष्ठ स्तरावर झाली आहे. यामुळे याचा भाजपला फायदा होणार आहे.
दरम्यान, यावरून मनसेवर टीका देखील केली जात आहे. भाजपच्या प्रचारात मनसे सहभागी होणार नाही. मात्र, थेट मतदानामध्ये मदत करणार अशी भूमिका मनेसेने घेतल्यामुळे तुम लढो, हम मनसे कपडे संभालते है, असा टोला अनेकांनी लगावला आहे.
