अहमदनगर- जिल्ह्यातील शेतकऱ्यांसमोरील कुकडीच्या पाणीप्रश्नाने गंभीर स्वरूप धारण केले आहे. विशेषतः उन्हाळ्यात पाण्याची तीव्र टंचाई जाणवते, जी कायमस्वरूपी सोडवण्यासाठी डिंभे ते माणिकडोह बोगदा हा एकमेव पर्याय असल्याचे खासदार नीलेश लंके यांनी ठामपणे मांडले आहे.
या बोगद्यासाठी जन आंदोलन उभारण्याची आणि आरपारची लढाई लढण्याची त्यांची तयारी असल्याचे त्यांनी पत्रकारांशी बोलताना स्पष्ट केले. हा प्रश्न केवळ शेतकऱ्यांच्याच नव्हे, तर संपूर्ण तालुक्याच्या भवितव्याशी निगडित आहे. लंके यांनी या मुद्द्यावर गेल्या लोकसभा निवडणुकीतही आपली भूमिका मांडली होती आणि आता ती प्रत्यक्ष कृतीत आणण्याचा त्यांचा निर्धार आहे.
अधिकाऱ्यांना सूचना
कुकडी प्रकल्पातील पाणी वितरणात सातत्याने अडचणी येत असल्याचे लंके यांनी अधोरेखित केले. मागील आवर्तनात श्रीगोंदा तालुक्यातील अनेक गावांतील शेतकरी पाण्यापासून वंचित राहिले. या काळात शेतकऱ्यांनी लंके यांच्याशी संपर्क साधून आपली व्यथा मांडली होती. त्यावर लंके यांनी जलसंपदा विभागाच्या अधिकाऱ्यांशी सातत्याने संवाद साधून पाणीपुरवठ्यासाठी सूचना दिल्या.
कायमची पाणी टंचाई दूर होणार
परंतु, ही तात्पुरती मलमपट्टी असून, कायमस्वरूपी उपायासाठी डिंभे-माणिकडोह बोगदा अत्यावश्यक असल्याचे त्यांचे म्हणणे आहे. माणिकडोह धरण पूर्ण क्षमतेने भरत नसल्याचा आजवरचा अनुभव आणि डिंभे धरण हे कुकडी प्रकल्पाचा कणा असल्याचे त्यांनी नमूद केले. हा बोगदा झाल्यास तीन ते चार टीएमसी अतिरिक्त पाणी उपलब्ध होऊ शकते, ज्यामुळे पाणीटंचाई दूर होण्यास मदत होईल.
पुणे जिल्ह्यातील मंडळीचा विरोध
हा बोगदा होण्याची मागणी अनेक वर्षांपासून प्रलंबित आहे, परंतु ती केवळ कागदावरच राहिली आहे. लंके यांनी या प्रश्नाचे राजकीय भांडवल न करता शाश्वत उपाययोजना करण्याची गरज व्यक्त केली. पुणे जिल्ह्यातील काही मंडळींचा या प्रकल्पाला विरोध असला, तरी तो झुगारून बोगदा पूर्ण करण्यासाठी आपला पाठपुरावा सुरू राहणार असल्याचे त्यांनी ठासून सांगितले.
यापूर्वी त्यांनी जलसंपदा मंत्री आणि वरिष्ठ अधिकाऱ्यांशी भेटी घेऊन पत्रव्यवहार केला आहे. आता या प्रश्नावर मोठे जन आंदोलन उभारण्याची तयारी त्यांनी दर्शवली आहे. या बोगद्यामुळे विसापूर खालच्या शेतकऱ्यांना प्रत्येक आवर्तनात येणाऱ्या अडचणींवरही मात करता येईल, असा त्यांचा विश्वास आहे.
पाणी प्रश्नावर कायमचा तोडगा
या पत्रकार परिषदेला आढळगावचे सरपंच शिवप्रसाद उबाळे, कोसेगव्हाणचे उपसरपंच भीमराव नलगे, आप्पासाहेब रोडे आणि प्रा. संजय लाकूडझोडे उपस्थित होते. हा बोगदा प्रकल्प मार्गी लागल्यास कुकडीच्या पाणीप्रश्नावर कायमस्वरूपी तोडगा निघू शकतो.
