8th Pay Commission : केंद्र सरकारने 8वा वेतन आयोग मंजूर केला असून तो लवकरच लागू होण्याची शक्यता आहे. पुढल्या महिन्यात म्हणजेच एप्रिलमध्ये आठव्या वेतन आयोगाच्या समितीची स्थापना होईल, आयोगाच्या अध्यक्षांच्या आणि सदस्यांची नियुक्ती होईल आणि त्यानंतर ही समिती पुढील एका वर्षात अभ्यास करून आपला अहवाल केंद्रातील सरकारकडे सुपूर्द करणार आहे.
पण एक जानेवारी 2026 पासून सरकारी कर्मचाऱ्यांना नवा वेतन आयोग लागू होणे अपेक्षित आहे. खरंतर सध्याचा सातवा वेतन आयोग हा 1 जानेवारी 2016 पासून लागू झाला असून प्रत्येक दहा वर्षांनी नवा वेतन आयोग लागू होता आला असल्याने पुढील आठवा वेतन आयोग जानेवारी 2026 पासून बहाल केला जाऊ शकतो असा दावा केला जात आहे.
सध्या केंद्रीय कर्मचाऱ्यांचे वेतन 7व्या वेतन आयोगानुसार निश्चित करण्यात आले आहे, जो 2016 पासून लागू आहे. पण नव्या वेतन आयोगामुळे सरकारी कर्मचाऱ्यांच्या वेतनात मोठी वाढ होण्याची शक्यता आहे. अहवालांनुसार, 8व्या वेतन आयोगासाठी फिटमेंट फॅक्टर 2.86 इतका वाढवला जाऊ शकतो.
जर हे प्रमाण स्वीकारले गेले, तर लेव्हल 1 मधील कर्मचाऱ्यांचे सध्याचे 18,000 रुपये मूळ वेतन थेट 51,480 रुपये होईल. तसेच, इतर संवर्गात कार्यरत असणाऱ्या कर्मचाऱ्यांच्याही वेतनात मोठी वाढ अपेक्षित आहे.
आता आपण आठवा वेतन आयोग लागू झाल्यानंतर कोणत्या कर्मचाऱ्यांचा पगार कितीने वाढणार याबाबत सविस्तर माहिती जाणून घेण्याचा प्रयत्न करणार आहोत.
सरकारी कर्मचाऱ्यांचा पगार कितीने वाढणार
नव्या वेतन आयोगामुळे केंद्र सरकारच्या विविध विभागांतील कर्मचारी व पेन्शनधारक यांना मोठा आर्थिक फायदा होणार आहे. लेव्हल 2 मधील कर्मचाऱ्यांचे वेतन 19,900 रुपयांवरून 56,914 रुपये होण्याची शक्यता आहे, तर लेव्हल 3 मध्ये 21,700 रुपयांचे वेतन 62,062 रुपये होऊ शकते.
लेव्हल 4 मध्ये 25,500 रुपये वेतन असलेल्या कर्मचाऱ्यांना 72,930 रुपये वेतन मिळू शकते. लेव्हल 5 मधील कर्मचाऱ्यांचे वेतन 29,200 रुपयांवरून 83,512 रुपये होण्याचा अंदाज आहे, तर लेव्हल 6 मधील वेतन 35,400 रुपयांवरून 1,01,244 रुपये होऊ शकते.
वरिष्ठ स्तरावरही मोठी वेतनवाढ अपेक्षित असून लेव्हल 7 मधील कर्मचाऱ्यांचे वेतन 44,900 रुपयांवरून 1,28,414 रुपये होण्याची शक्यता आहे.
लेव्हल 8 मध्ये 47,600 रुपये वेतन असलेल्या कर्मचाऱ्यांना 1,36,136 रुपये वेतन मिळू शकते, तर लेव्हल 9 मध्ये 53,100 रुपये वेतन असलेल्या कर्मचाऱ्यांना 1,51,866 रुपये वेतन मिळण्याचा अंदाज आहे.
लेव्हल 10 मधील कर्मचाऱ्यांचे वेतन 56,100 रुपयांवरून 1,60,446 रुपये होण्याची शक्यता आहे. एकंदरीत, केंद्रीय कर्मचाऱ्यांना नव्या वेतन आयोगाचा मोठा लाभ होणार असून सरकारकडून अंतिम निर्णय लवकरच जाहीर केला जाईल.
8वा वेतन आयोग लागू झाल्यास कर्मचाऱ्यांच्या आर्थिक स्थितीत मोठा बदल होईल. वाढत्या महागाईमुळे त्रस्त झालेल्या सरकारी कर्मचाऱ्यांना नव्या वेतन आयोगाचा नक्कीच दिलासा मिळणार आहे.
