Aadhar Card News : आजच्या डिजिटल युगात आधार कार्ड हे प्रत्येक भारतीयासाठी अत्यंत महत्त्वाचे ओळखपत्र बनले आहे. बँकिंग व्यवहार, सरकारी योजना, डीबीटी, सिम पडताळणी अशा अनेक सेवांसाठी आधारशी मोबाईल नंबर जोडलेला असणे गरजेचे आहे.
मात्र, मोबाईल नंबर बदलण्याची प्रक्रिया आतापर्यंत अनेकांसाठी त्रासदायक ठरत होती. लांब रांगा, फॉर्म भरणे, कागदपत्रे सादर करणे आणि मंजुरीसाठी वाट पाहणे, या सगळ्यामुळे लोक हैराण होत होते.
मात्र आता या समस्येवर मोठा दिलासा मिळाला आहे. इंडिया पोस्ट पेमेंट्स बँक (IPPB) ने आधारमध्ये मोबाईल नंबर अपडेट करण्यासाठी एक अत्यंत सोपी, जलद आणि पूर्णपणे पेपरलेस सुविधा सुरू केली आहे. या सेवेमुळे नागरिकांना कोणतेही फॉर्म भरावे लागणार नाहीत, ओळखपत्र किंवा फोटो सादर करण्याचीही आवश्यकता नाही.
या नवीन सुविधेअंतर्गत, नागरिकांना फक्त त्यांचा आधार क्रमांक आणि नवीन मोबाईल नंबर द्यावा लागतो. ओळख पडताळणीसाठी फक्त बायोमेट्रिक फिंगरप्रिंट वापरले जाते. बायोमेट्रिक्स यशस्वीरीत्या जुळल्यानंतर काही मिनिटांतच आधारमधील मोबाईल नंबर अपडेट केला जातो. प्रक्रिया पूर्ण झाल्यानंतर संबंधित व्यक्तीच्या मोबाईलवर पुष्टीकरणाचा एसएमएस देखील पाठवला जातो.
ही सुविधा केवळ शहरांपुरती मर्यादित नसून ग्रामीण भागातही उपलब्ध आहे. नागरिक आपल्या जवळच्या पोस्ट ऑफिस किंवा इंडिया पोस्ट पेमेंट्स बँकेच्या शाखेत जाऊन ही सेवा घेऊ शकतात.
विशेष म्हणजे ग्रामीण भागात राहणाऱ्या नागरिकांसाठी ग्रामीण डाक सेवक (GDS) घरी येऊनही ही प्रक्रिया पूर्ण करून देऊ शकतो, त्यामुळे वृद्ध, अपंग किंवा दूरवर राहणाऱ्या लोकांसाठी ही सेवा अत्यंत उपयुक्त ठरणार आहे.
ज्यांचा जुना मोबाईल नंबर बंद झाला आहे किंवा बराच काळ वापरात नाही, अशा नागरिकांसाठी ही सेवा विशेष फायदेशीर ठरत आहे. ओटीपी न आल्यामुळे बँकिंग व्यवहार किंवा सरकारी योजनांचा लाभ अडखळणाऱ्यांसाठी IPPB ची ही त्वरित मोबाईल अपडेट सुविधा खऱ्या अर्थाने वरदान ठरणार आहे. ही सेवा नाममात्र शुल्कात उपलब्ध असून, डिजिटल भारताच्या दिशेने टाकलेले हे एक महत्त्वाचे पाऊल मानले जात आहे.
