Buying New Home : नवं घर खरेदी करणं हा प्रत्येकासाठी आयुष्यातील मोठा आणि महत्त्वाचा निर्णय असतो. घर शोधण्यापासून ते कागदपत्रांची पडताळणी आणि आर्थिक जुळवाजुळव करण्यापर्यंत अनेक टप्पे या प्रक्रियेत येतात.
यापैकी सर्वात महत्त्वाचा आणि वेळखाऊ टप्पा म्हणजे घरासाठी लागणाऱ्या रकमेची व्यवस्था करणे. सध्याच्या वाढत्या घरांच्या किमती पाहता अनेकांच्या मनात प्रश्न निर्माण होतो—संपूर्ण बचतीतून घर खरेदी करावं की गृहकर्जाचा पर्याय स्वीकारावा?
आर्थिक तज्ज्ञांच्या मते, निर्णय घेण्यापूर्वी गुंतवणुकीवरील परतावा आणि गृहकर्जावरील व्याजदर यांची तुलना करणं अत्यावश्यक आहे.
उदाहरणार्थ, तुमच्या गुंतवणुकीवर वार्षिक १५ टक्के परतावा मिळत असेल आणि गृहकर्ज ९ टक्के व्याजदराने उपलब्ध असेल, तर कर्ज घेऊन गुंतवणूक कायम ठेवणं अधिक फायदेशीर ठरू शकतं.
उलट, गुंतवणुकीवर कमी परतावा आणि कर्जावरील व्याजदर जास्त असल्यास संपूर्ण रक्कम भरून घर खरेदी करणं योग्य ठरू शकतं.
बचतीतून घर खरेदी करण्याचा सर्वात मोठा फायदा म्हणजे व्याजाचा बोजा टळतो. दीर्घकालीन कर्जामध्ये अनेकदा व्याजाची रक्कम मूळ किमतीइतकी किंवा त्याहून अधिक होते.
तसेच रोकड व्यवहारामुळे खरेदीची प्रक्रिया जलद पूर्ण होते. मात्र, संपूर्ण साठवलेली रक्कम घरात गुंतवल्यास आपत्कालीन परिस्थितीत आर्थिक अडचणी निर्माण होऊ शकतात. त्यामुळे आर्थिक सुरक्षितता कमी होण्याचा धोका संभवतो.
दुसरीकडे, गृहकर्ज घेतल्यास बँकेमार्फत कागदपत्रांची कायदेशीर पडताळणी होते, ज्यामुळे व्यवहार सुरक्षित होतो. तसेच आयकर कायद्यातील कलम २४ आणि ८०सी अंतर्गत व्याज आणि मूळ रकमेवर करसवलत मिळते. वेळेवर हप्ते भरल्यास क्रेडिट स्कोअर सुधारतो. मात्र, व्याजदरातील चढ-उतारामुळे एकूण परतफेडीचा खर्च वाढू शकतो. कर्जफेडीत अडथळे आल्यास मालमत्ता गमावण्याचा धोका देखील असतो.
म्हणूनच घर खरेदीचा निर्णय घेताना आपल्या उत्पन्न, बचत, गुंतवणूक, भविष्यातील जबाबदाऱ्या आणि आर्थिक स्थैर्य यांचा सखोल विचार करूनच अंतिम निर्णय घेणे अधिक शहाणपणाचे ठरेल.
