D-Mart News : भारतामध्ये सर्वसामान्यांच्या दैनंदिन गरजांची खरेदी करण्यासाठी सर्वात विश्वासार्ह आणि स्वस्त पर्याय म्हणून डी-मार्टकडे पाहिले जाते. किराणा सामान, जीवनावश्यक वस्तू, कपडे, भांडी, घरगुती उपयोगाच्या वस्तू अशा विविध गोष्टी एकाच छताखाली कमी दरात उपलब्ध करून देणं हीच डी-मार्टची ओळख आहे.
त्यामुळे देशभरातील डी-मार्ट स्टोअर्समध्ये नेहमीच ग्राहकांची मोठी गर्दी पाहायला मिळते. या प्रचंड यशामुळे अनेकांच्या मनात डी-मार्टची फ्रँचायझी घेण्याचा विचार येणं साहजिक आहे.
मात्र, डी-मार्ट फ्रँचायझी किंवा एजन्सी देत नाही, ही वस्तुस्थिती आहे. इतर अनेक रिटेल ब्रँडप्रमाणे डी-मार्ट फ्रँचायझी मॉडेलवर काम करत नाही.
डी-मार्टचे सर्व स्टोअर्स हे थेट कंपनीच्या मालकीचे असून, त्यांचं संपूर्ण व्यवस्थापन कंपनी स्वतः करते. त्यामुळे “डी-मार्टची फ्रँचायझी कशी घ्यावी?” या प्रश्नाचं थेट उत्तर म्हणजे – डी-मार्ट फ्रँचायझी उपलब्ध नाही.
तरीही, डी-मार्टसोबत व्यवसायिक भागीदारी करण्याच्या काही संधी उपलब्ध आहेत. तुमच्याकडे शहरात किंवा शहरालगत योग्य ठिकाणी मोक्याची जमीन असेल, तर तुम्ही ती डी-मार्टला भाड्याने देऊ शकता.
डी-मार्ट मोठ्या क्षेत्रफळाच्या, पार्किंगसह आणि ग्राहकांना सहज पोहोचता येईल अशा जागांना प्राधान्य देते. यासाठी इच्छुक जमीनमालकांनी डी-मार्टच्या अधिकृत वेबसाईटवर जाऊन ‘Property / Land Proposal’ किंवा पुरवठादारांसाठीचा संबंधित फॉर्म भरावा लागतो.
याशिवाय, तुम्ही उत्पादक किंवा पुरवठादार असाल, तर डी-मार्टसोबत दीर्घकालीन भागीदारीची संधी देखील मिळू शकते. डी-मार्ट दर्जेदार, सातत्यपूर्ण आणि परवडणाऱ्या किमतीत उत्पादने पुरवणाऱ्या पुरवठादारांना प्राधान्य देते. कंपनीच्या म्हणण्यानुसार, एकदा विश्वासार्ह भागीदारी झाली की ती अनेक वर्षे टिकू शकते.
एकूणच, डी-मार्टची फ्रँचायझी नसली तरी जमीन भाड्याने देणं किंवा पुरवठादार म्हणून जोडणं हे डी-मार्टसोबत व्यवसाय करण्याचे व्यवहार्य आणि सुरक्षित मार्ग आहेत. अधिक अचूक आणि अद्ययावत माहितीसाठी डी-मार्टच्या अधिकृत वेबसाईटला भेट देणं गरजेचं आहे.
