Ditva Cyclone : हवामान खात्याकडून एक महत्त्वाचे अपडेट समोर येत आहे. हवामान खात्याने दिलेल्या माहितीनुसार, कोणत्याही क्षणी आता दितवा चक्रीवादळ धडकणार आहे. हे चक्रीवादळ नैऋत्य बंगालच्या उपसागरातून उत्तरेकडे सरकत आहे.
दरम्यान या ‘दितवा’ चक्रीवादळामुळे तामिळनाडू आणि पुद्दुचेरीमध्ये रविवारी हवामानाची परिस्थिती फारच गंभीर बनली आहे. चक्रीवादळाचा वेग थोडा कमी झाला आहे. मात्र असे असले तरी त्याचा प्रतिकूल परिणाम होणार आहे.
या वादळामुळे अनेक जिल्ह्यांत मुसळधार पावसाने दैनंदिन जीवन ठप्प झाले आहे. खराब हवामानाचा सर्वाधिक फटका चेन्नईला बसला आहे. उड्डाणांसाठी महत्त्वाच्या असलेल्या चेन्नई आंतरराष्ट्रीय विमानतळावर रविवारी एकूण ४७ उड्डाणे रद्द करण्यात आली.
यात ३६ देशांतर्गत आणि ११ आंतरराष्ट्रीय उड्डाणांचा समावेश आहे. विमानतळ प्राधिकरणाने दिलेल्या माहितीनुसार, कमी दृश्यमानता, जोरदार वारे आणि सतत कोसळणारा पाऊस यामुळे विमानतळाचे कामकाज विस्कळीत झाले आहे.
परिस्थिती अद्याप पूर्णपणे सुधारलेली नसल्याने आणखी उड्डाणांमध्ये बदल किंवा रद्द होण्याची शक्यता नाकारता येत नाही. त्यामुळे प्रवाशांनी प्रवासापूर्वी संबंधित विमान कंपन्यांकडून अद्ययावत वेळापत्रक तपासण्याचे आवाहन करण्यात आले आहे.
भारतीय हवामान विभागाने तामिळनाडू, पुद्दुचेरी आणि दक्षिण आंध्र प्रदेशच्या किनारी भागांसाठी ‘रेड अलर्ट’ जारी केला आहे. हवामान खात्याच्या मते, चक्रीवादळ ३० नोव्हेंबरच्या सकाळपर्यंत तामिळनाडू–पुद्दुचेरी किनाऱ्यावरून उत्तर दिशेने सरकेल.
चेन्नईसह अनेक जिल्ह्यांसाठी पुढील काही तासांमध्ये हलका ते मध्यम पाऊस, गडगडाट आणि वार्‍याचा वेग वाढण्याची शक्यता व्यक्त केली आहे. चक्रीवादळाचा प्रभाव कुड्डालोर, नागापट्टिनम, मयिलादुथुराई, विल्लुपुरम, चेंगलपट्टू, पुद्दुचेरी–करैकल, तंजावर, तिरुचिरापल्ली, चेन्नई, कांचीपुरम, तिरुवल्लूर आणि रानीपेट या जिल्ह्यांमध्ये सर्वाधिक राहणार आहे.
या भागांत अतिवृष्टी होण्याचा अंदाज हवामान खात्याने वर्तवला आहे. तसेच वेल्लोर, धर्मपुरी, दिंडीगुल आणि थेनी जिल्ह्यांतही मुसळधार पावसाची शक्यता कायम आहे.
दरम्यान, प्रशासन आणि हवामान खात्याने नागरिकांना घरातच राहण्याचे, अनावश्यक प्रवास टाळण्याचे, तसेच समुद्रकिनाऱ्यांपासून दूर राहण्याचे आवाहन केले आहे. जोरदार वारे आणि उंच लाटांच्या पार्श्वभूमीवर मच्छिमारांना समुद्रात न जाण्याचा कडक इशारा देण्यात आला आहे.
‘दितवा’ चक्रीवादळाची तीव्रता कमी होत असली तरी त्याचा प्रभाव अद्यापही धोकादायक असल्याचे हवामान खात्याने स्पष्ट केले असून पुढील काही तास परिस्थिती अत्यंत महत्त्वाची ठरणार आहे.
