EPFO News : आजची ही बातमी कमी पगार असतानाही करोडपती कसं व्हायचं? याचा रोडमॅप सांगणारी आहे. म्हणून आजची ही बातमी तुम्ही शेवटपर्यंत नक्कीच वाचायला हवी. मंडळी आपल्याला प्रत्येकाला आयुष्याची संध्याकाळ आनंदात घालवायचीये. यामुळे आपण सर्वजण अहोरात्र काबाडकष्ट करून पैसा कमवतोय. पैशाचा संचय करतोय आणि कमावलेले पैसे कुठेतरी गुंतवतोय.
दरम्यान जे लोक नोकरी करतात त्या लोकांचा पैसाही कर्मचारी भविष्य निर्वाह निधीमध्ये जमा होतोय. हा पैसा नोकरदार मंडळीला त्यांच्या निवृत्तीनंतर मिळतो. खरे तर कर्मचाऱ्यांना निवृत्तीनंतर ईपीएफचा लाभ दिला जातो. ही लाभ योजना कर्मचारी भविष्य निर्वाह निधी संघटनेद्वारे (ईपीएफओ) चालविली जाणारी सेवानिवृत्ती लाभ योजना आहे.
ईपीएफओ योजनेअंतर्गत नियोक्ता म्हणजे कर्मचारी ज्या ठिकाणी काम करतात ती कंपनी आणि कर्मचारी स्वतः दर महा ठराविक रक्कम गुंतवत असतात. जोपर्यंत कर्मचारी सदर कंपनीत काम करत आहे तोपर्यंत कंपनी आणि कर्मचाऱ्यांचे योगदान ईपीएफओ मध्ये जमा होत असते.
मंडळी ईपीएफ मध्ये जमा करण्यात आलेल्या योगदानावर कर्मचाऱ्यांना टॅक्स सवलतीचा लाभ मिळतो. शिवाय यामध्ये गुंतवलेल्या पैशांवर इतर बचत योजनांच्या आणि एफडी योजनांच्या तुलनेत अधिकचे व्याज सुद्धा मिळते. सध्या यामध्ये जमा असणाऱ्या रकमेवर ईपीएफओ च्या माध्यमातून 8.25 टक्के दराने व्याज दिले जात आहे.
पण या ईपीएफ योजनेतुनही एक कोटी रुपयांचा फंड तयार करता येऊ शकतो का? जर या योजनेतून एक कोटी रुपयांचा फंड तयार करायचा असेल तर या योजनेत नेमकी किती गुंतवणूक करावी लागेल? याचाच आढावा आज आपण घेणार आहोत.
ईपीएफओचे नियम काय आहेत
मंडळी कर्मचारी भविष्य निर्वाह निधीमध्ये म्हणजेच ईपीएफमध्ये कर्मचारी आपल्या मूळ वेतनाच्या आणि महागाई भत्त्याच्या 12 टक्के रक्कम जमा करतात अन एवढीच रक्कम कंपनीकडून सुद्धा जमा केली जाते. पण कंपनीकडून जमा होणाऱ्या रकमेपैकी 8.33% कर्मचारी पेन्शन फंड म्हणजेच ईपीएस मध्ये वर्ग होतात आणि 3.67% रक्कम ईपीएफ मध्ये जमा होते.
पण या योजनेची एक मोठी विशेषता आहे. ती म्हणजे कर्मचाऱ्यांना स्वैच्छिक भविष्य निर्वाह निधी (व्हीपीएफ) योगदानाचा सुद्धा पर्याय देण्यात आला आहे, ज्यामध्ये ते त्यांच्या नियोक्त्याला ईपीएफच्या 12% पेक्षा जास्त हिस्सा वजा करण्यास सांगू शकतात. व्हीपीएफ योगदान कमाल मूळ वेतन आणि महागाई भत्त्याच्या 100 टक्क्यांपर्यंत असू शकते, मूळ योगदानावर समान व्याज दर आहे.
इथं एक गोष्ट लक्षात घ्या ती म्हणजे जर तुमचे ऐच्छिक आणि बेसिक ईपीएफ योगदान एका आर्थिक वर्षात 2.5 लाख रुपयांपेक्षा जास्त असेल तर अतिरिक्त रकमेवर मिळणाऱ्या व्याजावर तुम्हाला कर सुद्धा भरावा लागणार आहे. आता आपण 25 हजार पगार असणारा कर्मचारी एक कोटीचा फंड कसा तयार करू शकतो हे समजून घेऊयात.
कसे तयार होणार 1 कोटी?
समजा 25 व्या वर्षी एखाद्या कर्मचाऱ्यांचा मूळ पगार आणि महागाई भत्ता असा एकूण पगार 25 हजार रुपये आहे अन दरवर्षी पगारवाढीमुळे त्याचे ईपीएफ अंशदान दहा टक्क्यांनी वाढत आहे. यात कर्मचाऱ्यांचे बेसिक पे 15 हजार राहील. आता एकूण ईपीएफ योगदान किती होतंय? तर कर्मचाऱ्यांच्या मूळ वेतनाच्या 12 टक्के म्हणजेच 1750 आणि कंपनीचे EPF मधील योगदान हे मूळ वेतनाच्या 3.67% म्हणजेच 550 रुपये असे एकूण 2300 EPF मध्ये जमा होतील.
आपण पगारवाढीच्या कारणाने या ईपीएफच्या योगदानात दरवर्षी 10 टक्क्यांची वाढ गृहीत धरली आहे. म्हणजेच दरमहा 2300 रुपये अन दरवर्षी 10 टक्क्यांची वाढ असे सतत सुरू राहिल्यास तीस वर्ष कालावधी उलटल्यानंतर म्हणजे जेव्हा कर्मचाऱ्यांचे वय 55 वर्षे होईल तेव्हा त्याच्या ईपीएफ अकाउंट मध्ये 1.07 कोटी रुपयांचा फंड जमा होऊ शकतो.
