EPFO News : ईपीएफओ (कर्मचारी भविष्य निर्वाह निधी संघटना) सदस्यांसाठी अत्यंत महत्त्वाची आणि दिलासादायक बातमी आहे. ईपीएफओकडून सर्व सेवा डिजिटल करण्याच्या दिशेने सातत्याने पावले उचलली जात असून, त्याचाच एक भाग म्हणून आता फेस ऑथेंटिकेशन टेक्नोलॉजीवर आधारित नवीन सुविधा सुरू करण्यात आली आहे. या नव्या सुविधेमुळे कर्मचारी केवळ सेल्फीच्या माध्यमातून काही मिनिटांत आपला युनिव्हर्सल अकाउंट नंबर (UAN) जनरेट करू शकणार आहेत.
यूएएन नंबर हा प्रत्येक कर्मचाऱ्याचा वेगळा आणि अत्यंत महत्त्वाचा ओळख क्रमांक असतो. या नंबरशिवाय कर्मचाऱ्याच्या पीएफ खात्यात पैसे जमा होत नाहीत. आतापर्यंत यूएएन तयार करण्यासाठी कर्मचाऱ्यांना आपल्या कंपनीवर किंवा नियोक्त्यावर अवलंबून राहावे लागत होते.
अनेकदा उशीर, चुकीची माहिती किंवा तांत्रिक अडचणींमुळे कर्मचाऱ्यांना मोठ्या त्रासाला सामोरे जावे लागत होते. काही वेळा तर सरकारी कार्यालयांच्या फेऱ्याही माराव्या लागत होत्या.
ईपीएफओचे प्रादेशिक आयुक्त (रिजनल कमिश्नर) हेमंत कुमार यांनी याबाबत सविस्तर माहिती दिली आहे. त्यांच्या म्हणण्यानुसार, आता ही सर्व प्रक्रिया पूर्णपणे बदलली असून ‘सेल्फ यूएएन जनरेशन’ सुविधा सुरू करण्यात आली आहे.
या नव्या व्यवस्थेत कर्मचारी आपल्या आधारशी जोडलेल्या फेस आयडीच्या माध्यमातून थेट यूएएन तयार करू शकतील. यासाठी आता कंपनीची किंवा नियोक्त्याची परवानगी घेण्याची गरज राहिलेली नाही.
सर्वात महत्त्वाची बाब म्हणजे, नव्याने तयार होणारा यूएएन नंबर थेट अॅक्टिव्ह होणार आहे. त्यामुळे वेगळ्या पद्धतीने अॅक्टिव्हेशन करण्याची आवश्यकता भासणार नाही.
यामुळे पीएफ खाते उघडण्याची प्रक्रिया अधिक सोपी, जलद आणि पारदर्शक होणार आहे. हे संपूर्ण काम ऑनलाइन पद्धतीने होणार असल्याने वेळेची बचत होईल आणि मानवी चुका टळण्यास मदत मिळेल.
ईपीएफओच्या या नव्या डिजिटल उपक्रमामुळे विशेषतः नवीन नोकरीला लागलेल्या कर्मचाऱ्यांना मोठा फायदा होणार आहे. काही मिनिटांत, कोणत्याही कार्यालयात न जाता किंवा नियोक्त्यावर अवलंबून न राहता, कर्मचारी स्वतःचा यूएएन नंबर तयार करू शकणार आहेत.
एकूणच, ईपीएफओची ही नवी सुविधा कर्मचाऱ्यांच्या दृष्टीने मोठा बदल घडवणारी ठरणार असून ‘डिजिटल इंडिया’च्या दिशेने आणखी एक महत्त्वाचे पाऊल मानले जात आहे.
