FASTag News : भारतीय राष्ट्रीय महामार्ग प्राधिकरणाने (NHAI) देशभरातील वाहनचालकांसाठी एक महत्त्वाचा आणि दिलासादायक निर्णय घेतला आहे. FASTag प्रणाली अधिक सोपी, जलद आणि वापरकर्त्यांसाठी अनुकूल करण्याच्या उद्देशाने NHAI ने ‘नो युअर व्हेईकल’ (KYV) पडताळणी प्रक्रियेत मोठा बदल जाहीर केला आहे.
सरकारच्या निर्णयानुसार, १ फेब्रुवारी २०२६ पासून कार, जीप आणि व्हॅनसाठी जारी होणाऱ्या नवीन FASTags वर KYV पडताळणी अनिवार्य राहणार नाही.
आतापर्यंत FASTag जारी केल्यानंतर KYV अंतर्गत वाहन पडताळणी करणे बंधनकारक होते. या प्रक्रियेत वाहनचालकांना वारंवार RC कागदपत्रे अपलोड करावी लागत होती, वाहनाचे फोटो पाठवावे लागत होते आणि अनेक वेळा टॅग पुन्हा पडताळावा लागत होता.
वैध कागदपत्रे असूनही FASTag सक्रिय होण्यास उशीर होत असल्याच्या तक्रारी मोठ्या प्रमाणावर वाढल्या होत्या. यामुळे वाहनचालकांना अनावश्यक त्रास सहन करावा लागत होता.
ही अडचण दूर करण्यासाठी NHAI ने KYV पडताळणीची जबाबदारी थेट बँकांकडे सोपवण्याचा निर्णय घेतला आहे. नवीन नियमांनुसार, बँका FASTag जारी करण्यापूर्वीच वाहनाशी संबंधित सर्व माहितीची पडताळणी करतील.
वाहन डेटाबेसद्वारे तपासणी केली जाईल आणि आवश्यक असल्यास नोंदणी प्रमाणपत्र (RC) च्या आधारे पडताळणी पूर्ण केली जाईल. त्यामुळे FASTag सक्रिय झाल्यानंतर स्वतंत्र KYV प्रक्रिया करण्याची गरज भासणार नाही.
या निर्णयाचा फायदा केवळ नवीन FASTag धारकांनाच नाही, तर आधीपासून FASTag वापरणाऱ्या वाहनचालकांनाही होणार आहे. पूर्वी जारी करण्यात आलेल्या FASTags साठीही नियमित KYV करणे आवश्यक राहणार नाही.
मात्र, चुकीच्या वाहनाशी टॅग जोडलेला आढळल्यास, गैरवापर, डुप्लिकेट टॅग किंवा तक्रारी-आधारित प्रकरणांमध्येच पुनर्पडताळणी केली जाईल.
नवीन नियमांमुळे FASTag खरेदी आणि वापरण्याची प्रक्रिया अधिक जलद आणि सुलभ होणार आहे. टॅग मिळताच तो त्वरित वापरता येईल. वारंवार कागदपत्रे अपलोड करण्याचा त्रास, बँक किंवा ग्राहक सेवा केंद्राच्या फेऱ्या आता टळणार आहेत. एकूणच, या निर्णयामुळे वाहनचालकांचा वेळ वाचणार असून FASTag प्रणाली अधिक कार्यक्षम आणि विश्वासार्ह बनेल.
