Bank Holiday List 2026:- नवीन वर्षाची सुरुवात होताच अनेक लोकांची बँकेशी संबंधित महत्त्वाची कामे असतात. पगार जमा करणे, कर्जाचे हप्ते भरणे, धनादेश जमा करणे, खाते अपडेट करणे, लॉकरशी संबंधित कामे किंवा इतर कागदपत्रांची पूर्तता अशी अनेक कामे बँकेत जाऊनच करावी लागतात. मात्र जानेवारी २०२६ महिन्यात बँकांच्या सुट्ट्या जास्त असल्याने जर तुम्ही वेळेचे योग्य नियोजन केले नाही, तर तुमची कामे रखडण्याची शक्यता आहे.
जानेवारी 2026 मध्ये किती दिवस आहेत बँकांना सुट्ट्या?
भारतीय रिझर्व्ह बँकेने जाहीर केलेल्या यादीनुसार जानेवारी महिन्यात एकूण १६ दिवस बँका बंद राहणार आहेत. यामध्ये नियमित रविवार, दुसरा आणि चौथा शनिवार यासोबतच विविध सण, उत्सव आणि राष्ट्रीय दिवसांच्या सुट्ट्यांचा समावेश आहे. त्यामुळे नागरिकांनी आधीच बँकेची कामे पूर्ण करणे अत्यंत महत्त्वाचे ठरणार आहे. जानेवारी महिन्यात ४ रविवार आणि २ शनिवार हे नेहमीप्रमाणे सुट्टीचे दिवस असतील.
त्याशिवाय नवीन वर्ष, मकर संक्रांती, पोंगल, स्वामी विवेकानंद जयंती, नेताजी सुभाषचंद्र बोस जयंती, वसंत पंचमी आणि प्रजासत्ताक दिन यांसारख्या महत्त्वाच्या दिवसांमुळे बँकांचे कामकाज अनेक ठिकाणी बंद राहील. १ जानेवारी रोजी नवीन वर्षानिमित्त काही उत्तर-पूर्व राज्यांमध्ये बँका बंद असतील. २ जानेवारी रोजी कोची आणि तिरुवनंतपुरम येथे नवीन वर्ष उत्सव किंवा मन्नम जयंतीमुळे सुट्टी असेल. १२ जानेवारी रोजी स्वामी विवेकानंद जयंतीनिमित्त कोलकातामधील बँका बंद राहतील.
१४ जानेवारी रोजी मकर संक्रांती आणि माघ बिहू असल्याने अहमदाबाद, भुवनेश्वर आणि गुवाहाटी येथे बँकांना सुट्टी असेल. १५ जानेवारी रोजी पोंगल आणि उत्तरायण सणामुळे बेंगळुरू, चेन्नई आणि हैदराबाद येथे बँका बंद राहतील. २३ जानेवारी रोजी नेताजी सुभाषचंद्र बोस जयंती आणि वसंत पंचमीमुळे कोलकाता आणि भुवनेश्वर येथे सुट्टी असेल. २६ जानेवारी रोजी प्रजासत्ताक दिन असल्याने मुंबई, नागपूरसह देशातील सर्व प्रमुख शहरांमध्ये बँका पूर्णपणे बंद राहतील.
याशिवाय ४, ११, १८ आणि २५ जानेवारी हे चारही रविवार बँकांसाठी सुट्टीचे दिवस असतील, तर १० जानेवारी हा दुसरा शनिवार आणि २४ जानेवारी हा चौथा शनिवार असल्याने त्या दिवशीही बँकांचे कामकाज बंद राहील. त्यामुळे संपूर्ण महिन्यात जवळपास निम्म्या दिवसांमध्ये बँकेत प्रत्यक्ष जाऊन काम करता येणार नाही. याचा परिणाम केवळ सामान्य ग्राहकांवरच नाही तर व्यापारी, व्यावसायिक, नोकरदार आणि ज्येष्ठ नागरिकांवरही होऊ शकतो.
जानेवारी महिना गुंतवणूकदारांसाठी आहे महत्त्वाचा
तसेच गुंतवणूकदारांसाठीही हा महिना महत्त्वाचा आहे, कारण शेअर बाजारातही जानेवारी महिन्यात एकूण ९ दिवस ट्रेडिंग बंद राहणार आहे. यामध्ये शनिवार आणि रविवारच्या ८ साप्ताहिक सुट्ट्या आणि २६ जानेवारीच्या राष्ट्रीय सुट्टीचा समावेश आहे. त्यामुळे शेअर्स खरेदी-विक्रीचे नियोजन करणाऱ्यांनी या सुट्ट्यांची नोंद ठेवणे गरजेचे आहे. मात्र दिलासादायक बाब म्हणजे बँकांच्या शाखा बंद असल्या तरी ग्राहकांसाठी ऑनलाइन बँकिंग सेवा सुरू राहणार आहेत.
मोबाईल बँकिंग, इंटरनेट बँकिंग, यूपीआय व्यवहार, एटीएममधून पैसे काढणे किंवा जमा करणे या सुविधा चोवीस तास उपलब्ध असतील. त्यामुळे पैसे ट्रान्सफर करणे, बिल भरणे किंवा इतर डिजिटल व्यवहार सहज करता येतील. तरीदेखील ज्या कामांसाठी बँकेत प्रत्यक्ष जाणे आवश्यक आहे, ती कामे वेळेत पूर्ण करण्याचा सल्ला तज्ज्ञ देत आहेत. एकूणच जानेवारी २०२६ मध्ये बँक सुट्ट्यांचे योग्य नियोजन केल्यास गैरसोय टाळता येईल आणि तुमची आर्थिक कामे सुरळीत पार पडतील.
