Job Alert : नवी मुंबई महानगरपालिकेत (NMMC) नोकरी करण्याचे स्वप्न पाहणाऱ्या तरुणांसाठी अत्यंत आनंदाची बातमी आहे. महानगरपालिकेने गट-अ, ब आणि क संवर्गातील एकूण १३२ रिक्त पदांसाठी अधिकृत भरती जाहीर केली आहे.
या भरतीमध्ये वैद्यकीय तज्ज्ञ, पशुवैद्यकीय अधिकारी, सहाय्यक आयुक्त, कनिष्ठ अभियंता तसेच विधी अधिकाऱ्यांसारख्या प्रतिष्ठित पदांचा समावेश असून, निवड झालेल्या उमेदवारांना आकर्षक वेतनश्रेणी मिळणार आहे. सर्वोच्च पगार तब्बल १,४२,४०० रुपयांपर्यंत असू शकतो.
या भरती प्रक्रियेद्वारे एकूण १३२ जागा भरल्या जाणार आहेत. यामध्ये सर्वाधिक म्हणजे ११३ जागा वैद्यकीय तज्ज्ञ आणि अधिकाऱ्यांसाठी आहेत. यामध्ये बालरोगतज्ज्ञ, स्त्रीरोगतज्ज्ञ, रेडिओलॉजिस्ट, वैद्यकीय अधिकारी तसेच पशुवैद्यकीय अधिकाऱ्यांचा समावेश आहे. या पदांसाठी MD, MBBS किंवा पशुवैद्यकीय शाखेतील पदव्युत्तर पदवी आवश्यक आहे.
याशिवाय सहाय्यक आयुक्त पदासाठी ५ जागा उपलब्ध असून, यासाठी कोणत्याही शाखेतील पदवीधर उमेदवार अर्ज करू शकतात. कनिष्ठ अभियंता (विद्युत/यांत्रिकी) पदासाठी १२ जागा असून, संबंधित अभियांत्रिकी शाखेतील पदवी आवश्यक आहे. तसेच उपसचिव व सहाय्यक विधी अधिकारी या पदांसाठी २ जागा असून, LLB पदवीसोबत किमान ३ वर्षांचा अनुभव आवश्यक आहे.
या भरतीसाठी उमेदवारांचे वय १८ ते ३८ वर्षे (१ डिसेंबर २०२५ पर्यंत) असणे आवश्यक आहे. मागासवर्गीय, अनाथ आणि दिव्यांग उमेदवारांना शासन नियमांनुसार ५ वर्षांपर्यंत वयोमर्यादेची सूट देण्यात येणार आहे.
ऑनलाईन अर्ज करण्याची शेवटची तारीख १९ फेब्रुवारी २०२६ आहे. अर्ज शुल्क खुल्या प्रवर्गासाठी १,००० रुपये तर मागासवर्गीय, EWS आणि दिव्यांग उमेदवारांसाठी ९०० रुपये निश्चित करण्यात आले आहे.
इच्छुक उमेदवारांनी नवी मुंबई महानगरपालिकेच्या अधिकृत भरती पोर्टलवर जाऊन अर्ज करावा. अर्ज करताना सर्व शैक्षणिक कागदपत्रे व अनुभवाचे दाखले तयार ठेवण्याचे आवाहन करण्यात आले आहे.
अनेक वर्षांच्या प्रतीक्षेनंतर होत असलेल्या या मोठ्या भरतीमुळे नवी मुंबईतील तरुणांमध्ये उत्साहाचे वातावरण असून, पात्र उमेदवारांनी ही संधी नक्कीच साधावी, असे आवाहन महानगरपालिकेकडून करण्यात आले आहे.
