Ladki Bahin Yojana : मध्यप्रदेश राज्य शासनाच्या धर्तीवर सुरू करण्यात आलेल्या मुख्यमंत्री माझी लाडकी बहीण योजनेच्या बाबत एक महत्त्वपूर्ण अपडेट समोर आले आहे. खरेतर, महाराष्ट्र राज्य निवडणूक आयोगाने स्थानिक स्वराज्य संस्थांच्या निवडणुकांची घोषणा केल्यापासून राज्यातील राजकीय वातावरण पूर्णपणे ढवळून निघाले आहे.
राज्यातील नगरपंचायती आणि नगरपरिषदेच्या निवडणुका येत्या दोन आणि तीन तारखेला होणार आहेत. त्यानंतर दुसऱ्या टप्प्यात महापालिकेच्या निवडणुका होतील आणि त्यानंतर मग तिसऱ्या टप्प्यात ग्रामपंचायतीच्या निवडणुका होणार आहेत.
दरम्यान स्थानिक स्वराज्य संस्थांच्या निवडणुकांच्या पार्श्वभूमीवर राज्यात राजकीय वातावरण तापू लागले असून, विविध आश्वासनांचा पाऊस पडताना दिसत आहे. याच पार्श्वभूमीवर महायुती सरकारने पुन्हा एकदा राज्यातील सर्वसामान्यांसाठी मोठी घोषणा केली आहे.
खरे तर गेल्या वर्षी संपन्न झालेल्या विधानसभा निवडणुकीच्या पार्श्वभूमीवर महायुती सरकारने लाडके बहिण योजना सुरू केली होती. या योजनेच्या माध्यमातून पात्र ठरणाऱ्या महिलांना दरमहा पंधराशे रुपयांचा लाभ दिला जात असून आता या योजनेच्या बाबत आणखी एक मोठी घोषणा झाली आहे.
महसूल मंत्री चंद्रशेखर बावनकुळे यांनी चंद्रपूर जिल्ह्यातील घुग्घुस नगरपरिषद निवडणुकीत प्रचारसभेत मोठ्या घोषणा करत मतदारांना आकर्षित करण्याचा प्रयत्न केला. शनिवारी घुग्घुस येथे झालेल्या सभेत बोलताना बावनकुळे म्हणाले की, “राज्यातील तुकडेबंदी कायदा आम्ही हटवला आहे.
आता त्या सर्व घरांना प्रॉपर्टी कार्ड देण्याचा निर्णायक निर्णय राज्य सरकार करणार आहे.” गावोगाव भूमिअभिलेखाशी संबंधित अनेक वाद आणि अडचणी दूर करण्यासाठी हा मोठा पाऊल असल्याचे त्यांनी सांगितले.
महिला सक्षमीकरणावर भर देताना त्यांनी ‘लाडक्या बहीण’ योजनेअंतर्गत महिला बचत गटांना थेट १ लाख रुपयांचे अनुदान देण्याचे आश्वासन दिले. यामुळे ग्रामीण व शहरी भागातील लघुउद्योग, सूक्ष्म व्यवसाय आणि स्वयंरोजगाराला मोठी चालना मिळेल, असे ते म्हणाले.
शेतकऱ्यांसाठीही महत्त्वाच्या घोषणा या सभेत करण्यात आल्या. शेतकऱ्यांची प्रलंबित वीजबिल माफी करण्याचा निर्धार सरकारने केला असल्याचे ते म्हणाले. याशिवाय केंद्रस्थानी ठेवलेल्या ‘सूर्यघर’ योजनेतून सामान्य नागरिकांना मोफत वीज देण्याचा संकल्प त्यांनी व्यक्त केला.
वाढत्या वीजदरांच्या पार्श्वभूमीवर ही घोषणा नागरिकांना दिलासा देणारी असल्याचे त्यांनी स्पष्ट केले. सभेत त्यांनी आक्रमक भूमिकाही घेतली. काँग्रेसवर टीका करताना बावनकुळे म्हणाले की, “काँग्रेस हे बुडतं जहाज असून विकासाच्या नावाने जनतेची दिशाभूल करण्यापलीकडे त्यांच्याकडे कोणताही कार्यक्रम नाही.”
राज्यातील बदलत्या राजकीय परिस्थितीत काँग्रेस हतबल झाली असून जनतेचा विश्वास गमावल्याची टीका त्यांनी केली. यावेळी त्यांनी घुग्घुस नगरपरिषद निवडणुकीत भाजप समर्थित उमेदवार पूजा ताई दुर्गम यांना विजय मिळवून देण्याचे आवाहन मतदारांना केले.
“पूजा ताईंच्या नेतृत्वाखाली घुग्घुसचा विकास जलद गतीने होईल,” असा विश्वास त्यांनी व्यक्त केला. स्थानिक पातळीवर सुरू झालेल्या या प्रचारसभेमुळे निवडणूक रंगतदार होण्याची चिन्हे दिसत आहेत.
विविध योजनांच्या घोषणा, राजकीय टीका आणि विकासाच्या आश्वासनांनी वातावरण तापू लागले असून पुढील काही दिवसांत प्रचार आणखी जोमदार होण्याची दाट शक्यता आहे.
