Maharashtra Bus Station News : महाराष्ट्रातील प्रमुख शहरांमधील बसस्थानकाचा कायापालट करण्याचा निर्णय सरकारकडून घेण्यात आला असून आता महाराष्ट्रातील एका शहरात एअरपोर्ट सारखे बसस्थानक तयार होणार असल्याची बातमी समोर आली आहे. मिळालेल्या माहितीनुसार सातारा शहरात एअरपोर्ट सारखे दिसणारे अन सोई सुविधा असणारे बस स्थानक तयार होणार आहे.
या बसस्थानकामुळे प्रवाशांना मोठा दिलासा मिळणार आहे. सातारा शहराबाबत बोलायचं झालं तर हे शहर पुणे बेंगलोरु महामार्गावर वसलेले आहे. साताऱ्यात महाराष्ट्रासहित परराज्यातून येणाऱ्या प्रवाशांची संख्या फारच उल्लेखनीय असून येथे येणाऱ्यांसाठी साताऱ्यातील बसस्थानक एक महत्त्वाचा दुवा ठरते.
सातारातील बसस्थानक वाहतुकीचे केंद्रबिंदू आहे. या बसस्थानकातून जिल्ह्यातील ग्रामीण भागात तसेच आसपासच्या तालुक्यांमध्ये जाण्यासाठी बसेस उपलब्ध आहेत. हे स्थानक शहर व जिल्ह्यातील ग्रामीण भागांशी तसेच आसपासच्या तालुक्यांशी संपर्क साधण्याचे मुख्य साधन असल्याचे बोलले जाते.
सातार्‍यात अनेक शैक्षणिक संस्था, प्रशासकीय कार्यालये व न्यायालये असल्याने विद्यार्थ्यांसह, अधिकारी, कर्मचारी यांच्या दैनंदिन प्रवासासाठी सातारा बसस्थानक महत्त्वाचे ठरते. सातारा जिल्ह्यासह शहर परिसरात अजिंक्यतारा किल्ला, सज्जनगड, ठोसेघर धबधबा, कास पठार, महाबळेश्वर, पाचगणी ही महत्त्वाची पर्यटनस्थळे आहेत.
त्यामुळे पर्यटन प्रवाशांसाठी हे बसस्थानक प्रवेशद्वाराचेच काम करते. व्यापारी, शेतकरी, विक्रेते यांच्यासाठी बससेवा ही जीवनरेषा आहे. साताऱ्यातील या बसस्थानकांमुळे वस्तूंची व लोकांची वाहतूक सुलभ होते. मुंबई ठाणे पुणे कोल्हापूर सोलापूर नाशिक अशा विविध जिल्ह्यांमध्ये साताऱ्यातून थेट बस सेवा उपलब्ध आहे.
त्यामुळे तुम्ही सातारा बसस्थानकात नेहमीच प्रवाशांची प्रचंड गर्दी पाहिली असेल. सातारा बसस्थानकातून दररोज शेकडो बसेस बाहेर पडतात आणि शेकडो बसेस मध्ये येतात. या बसेस मधून हजारो प्रवासी प्रवास करतात. म्हणजेच सातारा बस स्थानकात दररोज हजारोंची गर्दी असते.
हेच कारण आहे की आता साताऱ्यात नवीन बसस्थानक तयार होणार असून हे बसस्थानक अगदीच एअरपोर्ट सारखे बनवले जाणार असल्याचा दावा केला जातोय. सातारा मध्यवर्ती बसस्थानकाची पर्यावरणपूरक रचना असेल. सौरऊर्जेचा वापर, पावसाचे पाणी संकलन व जलपुनर्वापर, कचरा व्यवस्थापनासाठी आधुनिक प्रणालीचा वापर करण्यात येणार आहे.
उत्तम वायूविजन राहिल, अशी व्यवस्था करण्यात येणार आहे. हे बसस्थानक पर्यावरणपूरकतेचा आदर्शही निर्माण करणार आहे. महत्त्वाचे म्हणजे या बसस्थानकाला ऐतिहासिक लूक दिला जाणार आहे. बसस्थानकाच्या मध्यभागी दीपस्तंभ उभारला जाणार आहे. त्यामुळे या बस स्थानकाची शोभा वाढेल आणि साताराच्या शिरेपेच्यात मानाचा तुरा रोवला जाणार आहे.
बसस्थानक परिसरात लावण्यात येणार्‍या लाईट व त्यामध्ये सण, उत्सवानुसार बदलणारे लायटिंग असेल. या बसस्थानक प्रकल्पासाठी जवळपास 15 कोटी रुपयांचा निधी उपलब्ध करून देण्यात आला असल्याची माहिती हाती आली आहे. महत्त्वाचे म्हणजे हा सर्व खर्च राज्य शासन करणार असून या प्रकल्पाच्या कामाला लवकरच सुरुवात होणार आहे.
