Maharashtra New Expressway : गेल्या काही वर्षांमध्ये राज्यात रस्ते विकासाच्या अनेक प्रकल्पांची कामे पूर्ण झाले आहेत. तसेच अजूनही अनेक मोठमोठ्या प्रकल्पांची कामे सुरू आहेत. दरम्यान राज्यातील नागरिकांसाठी आणखी एक महामार्ग लवकरच पूर्ण क्षमतेने खुला होणार आहे. देवेंद्र फडणवीस यांचा ड्रीम प्रोजेक्ट म्हणून ओळखला जाणारा समृद्धी महामार्ग आता पूर्ण क्षमतेने वाहतुकीसाठी खुला केला जाणार आहे.
खरे तर या महामार्ग प्रकल्पाचा शेवटचा टप्पा बाकी होता, पण आता या शेवटच्या टप्प्याचे काम पूर्ण झाले असून लवकरच याचे उद्घाटन होण्याची शक्यता आहे. म्हणजे आगामी काळात मुंबई ते नागपूर दरम्यान चा प्रवास वेगवान होणार आहे.
समृद्धी महामार्ग हा 701 किलोमीटर लांबीचा महामार्ग असून या महामार्ग प्रकल्पाला हिंदुरुदय सम्राट बाळासाहेब ठाकरे समृद्धी महामार्ग म्हणून ओळखले जाते. सध्या समृद्धी महामार्गाचा 625 किलोमीटर लांबीचा भाग वाहतुकीसाठी सुरू आहे.
या मार्गाचा पहिला टप्पा अर्थात नागपूर ते शिर्डी हा 520 किलोमीटर लांबीचा टप्पा डिसेंबर 2022 मध्ये वाहतुकीसाठी सुरू करण्यात आला होता. यानंतर शिर्डी ते भरवीर हा 80 किलोमीटर लांबीचा टप्पा 2023 मध्ये सुरू करण्यात आला.
पुढे 2024 मध्ये या मार्गाचा भरवीर ते इगतपुरी हा 25 किलोमीटर लांबीचा टप्पा सुरू झाला. दरम्यान आता या मार्गाचा शेवटचा टप्पा म्हणजेच इगतपुरी ते आमने हा 70 किलोमीटर लांबीचा टप्पा या चालू महिन्यात अर्थात मार्च 2025 मध्ये खुला होण्याची शक्यता आहे.
गुढीपाडव्यापर्यंत या मार्गाचा शेवटचा टप्पा हा वाहतुकीसाठी खुला होईल असा दावा मीडिया रिपोर्ट मध्ये होतोय. म्हणजेच मराठी नववर्षाच्या सुरुवातीलाच मुंबई ते नागपूर दरम्यान चा प्रवास वेगवान होणार आहे. हा महामार्ग पूर्ण क्षमतेने सुरू झाल्यानंतर नागपूर ते मुंबई हा प्रवास फक्त आठ तासात पूर्ण होईल असा दावा केला जातोय.
हा महामार्ग प्रकल्प राज्य रस्ते विकास महामंडळाकडून विकसित केला जात असून हा मार्ग मार्च महिन्यात पूर्णपणे सुरू होईल अशी माहिती राज्य रस्ते विकास महामंडळाच्या अधिकाऱ्यांकडून दिली जात आहे.
सध्या नागपूर ते इगतपुरी हा 625 किलोमीटर लांबीचा महामार्ग वाहतुकीसाठी सुरू असून इगतपुरी ते आमने या 70 किलोमीटर लांबीचे काम 10 मार्चपर्यंत पूर्ण होईल अशी आशा आहे.
भविष्यात हा महामार्ग जेएनपीटी आणि नागपूर आंतरराष्ट्रीय विमानतळाला जोडला जाणार आहे. हा महामार्ग प्रकल्प विदर्भ, मराठवाडा आणि उत्तर महाराष्ट्रातील 24 जिल्ह्यांमधील कनेक्टिव्हिटी वाढवण्यास मदत करणार आहे.
