Maharashtra Schools : राज्यातील शिक्षक आणि शिक्षकेतर कर्मचाऱ्यांची एक मोठी मागणी सरकारने मान्य केली आहे. शिक्षकांपुढे अखेर शासनाने गुडघे टेकले आहेत. आम्ही आपणास सांगू इच्छितो की गेल्या काही दिवसांपासून शिक्षक आणि शिक्षकेतर कर्मचाऱ्यांच्या माध्यमातून शिक्षक समायोजनेला स्थगिती देण्याची मागणी केली जात होती.
टीईटी सक्तीच्या विरोधात आणि शिक्षक समायोजनेच्या विरोधात शिक्षकांकडून राज्यव्यापी आंदोलन देखील पुकारण्याचा इशारा देण्यात आला आहे. शिक्षकांकडून पाच डिसेंबर रोजी शाळा बंद आंदोलनाची हाक देण्यात आली आहे.
दरम्यान अशी सारी परिस्थिती असतानाच आता राज्य शासनाच्या शिक्षण विभागाकडून महत्त्वाचा निर्णय घेण्यात आला आहे. खरेतर राज्यातील शाळांमधील शिक्षक समायोजन प्रक्रियेमुळे अनेक शाळा बंद पडण्याची भीती व्यक्त होत होती.
यामुळे अनेक विद्यार्थी शाळाबाह्य होणार होते. या निर्णयामुळे हजारो शिक्षक अतिरिक्त होण्याची भीती पण वर्तवण्यात आली होती. यामुळे या प्रक्रियेला स्थगिती देण्याची मागणी उपस्थित करण्यात आली आणि आज अखेर फडणवीस सरकारने शिक्षकांच्या मागणी पुढे नमत घेतलं.
राज्य सरकारने या प्रक्रियेला तात्पुरती स्थगिती देण्याचा अगदीच महत्त्वाचा निर्णय आज घेतला आहे. आता शैक्षणिक वर्ष 2025-26 च्या संचमान्यतेनंतरच पुढील समायोजनाची प्रक्रिया राबवली जाणार असल्याने शिक्षक व शिक्षकेतर कर्मचाऱ्यांना मोठा दिलासा मिळाला आहे.
शिक्षण आयुक्त सचिंद्र प्रताप सिंह यांनी संबंधित विभागीय शिक्षण उपसंचालक, प्राथमिक व माध्यमिक शिक्षणाधिकाऱ्यांना याबाबत परिपत्रकाद्वारे माहिती दिली.
शालेय शिक्षण विभागाच्या आधीच्या शासन निर्णयाविरोधात विविध शिक्षक संघटनांनी उच्च न्यायालयात याचिका दाखल केली होती. न्यायालयाच्या निरीक्षणांनंतर 15 मार्च 2025 रोजीच्या संचमान्यतेनुसार सुधारित कार्यपद्धती लागू करण्याचे निर्देश देण्यात आले होते.
दरम्यान, 2025-26 या शैक्षणिक वर्षाच्या ऑनलाइन संचमान्यतेची प्रक्रिया अंतिम टप्प्यात असल्याने आणि 2024-25च्या संचमान्यतेनुसार अतिरिक्त ठरलेल्या शिक्षकांचे समायोजन डिसेंबर 2025 मध्ये करावे लागणार असल्याने, पुढील काही महिन्यांत समायोजनाची प्रक्रिया दोनदा राबवावी लागणार होती.
प्रशासनाच्या मते, ही दुबार प्रक्रिया टाळण्यासाठी फक्त 2025-26च्या संचमान्यतेनुसारच एकदाच समायोजन करण्याचा मार्ग अधिक योग्य असल्याचे ठरवण्यात आले. या पार्श्वभूमीवर 20 नोव्हेंबर रोजी जारी केलेल्या अतिरिक्त शिक्षक समायोजनावरील पत्राला स्थगिती देण्यात आली आहे.
आगामी संचमान्यता प्रसिद्ध झाल्यानंतर निश्चित कार्यपद्धतीनुसारच नवीन समायोजन करण्यात येईल, असे आयुक्तांच्या पत्रात नमूद केले आहे. मुख्याध्यापक महामंडळाने या निर्णयाचे स्वागत केले आहे.
महामंडळाचे अध्यक्ष तानाजी माने यांनी सांगितले की, 2024-25च्या संचमान्यतेनुसार समायोजन केल्यास नववी-दहावीच्या विद्यार्थ्यांचे शैक्षणिक नुकसान होण्याची तसेच राज्यातील 600 हून अधिक मराठी माध्यम शाळा बंद पडण्याची शक्यता होती.
या अडचणी शासनाच्या निदर्शनास आणून दिल्यानंतर मागणीप्रमाणे नवीन संचमान्यतेनुसार समायोजन करण्याचा निर्णय घेण्यात आला. माने यांनी पुढे सांगितले की, “मे महिन्यातच समायोजन प्रक्रिया पूर्ण झाल्यास शिक्षक किंवा विद्यार्थ्यांना कोणत्याही प्रकारची अडचण उद्भवणार नाही.” या निर्णयाचे राज्यातील शिक्षक आणि शिक्षक इतर कर्मचाऱ्यांच्या माध्यमातून स्वागत करण्यात आले आहे.
