Railway Employee News : भारतीय रेल्वेमध्ये नुकत्याच उघडकीस आलेल्या बनावट चांदीच्या पदक प्रकरणामुळे मोठी खळबळ उडाली आहे. या प्रकरणाचे गंभीर परिणाम होत असून, रेल्वे बोर्डाने एक महत्त्वाचा आणि ऐतिहासिक निर्णय घेतला आहे. तब्बल २० वर्षांपासून निवृत्त रेल्वे अधिकारी व कर्मचाऱ्यांना दिली जाणारी सुवर्णमंडित चांदीची पदके देण्याची परंपरा तात्काळ बंद करण्यात आली आहे.
रेल्वे बोर्डाच्या प्रधान कार्यकारी संचालक रेणू शर्मा यांनी बुधवारी, २८ जानेवारी २०२६ रोजी यासंदर्भात अधिकृत आदेश जारी केला. या आदेशात स्पष्टपणे नमूद करण्यात आले आहे की, निवृत्त कर्मचाऱ्यांना निरोप भेट म्हणून दिली जाणारी सुवर्णमंडित रौप्य पदके (Gold Plated Silver Medals) यापुढे देण्यात येणार नाहीत.
मार्च २००६ पासून रेल्वे प्रशासनाकडून निवृत्तीप्रसंगी सुमारे २० ग्रॅम वजनाचे सोन्याचा मुलामा दिलेले चांदीचे नाणे आदर आणि सेवेचे प्रतीक म्हणून दिले जात होते.
गेल्या दोन दशकांत देशभरातील हजारो रेल्वे कर्मचाऱ्यांना ही निरोप भेट देण्यात आली होती. मात्र, भोपाळ रेल्वे विभागात उघड झालेल्या एका गंभीर घोटाळ्यामुळे ही परंपरा प्रश्नांकित झाली.
तपासादरम्यान असे आढळून आले की, निवृत्त कर्मचाऱ्यांना देण्यात आलेल्या अनेक पदकांमध्ये चांदीचे प्रमाण केवळ ०.२३ टक्के होते. म्हणजेच, ज्या पदकांना चांदीचे म्हणून सादर करण्यात आले होते, ती प्रत्यक्षात जवळजवळ पूर्णपणे बनावट होती.
या प्रकारानंतर रेल्वे प्रशासनाने संबंधित पुरवठादाराविरोधात एफआयआर दाखल केला असून, त्याला काळ्या यादीत टाकण्याची प्रक्रिया सुरू करण्यात आली आहे.
याशिवाय, रेल्वेकडे सध्या उपलब्ध असलेला सुवर्णमंडित पदकांचा साठा यापुढे निवृत्ती भेट म्हणून वापरला जाणार नाही. हा साठा प्रशासकीय किंवा अन्य पर्यायी कारणांसाठी वापरण्यात येणार असल्याचे आदेशात नमूद करण्यात आले आहे.
रेल्वे बोर्डाच्या निर्णयानुसार, हा नवा नियम ३१ जानेवारी २०२६ रोजी निवृत्त होणाऱ्या अधिकारी व कर्मचाऱ्यांनाही लागू होणार आहे. त्यामुळे या तारखेला किंवा त्यानंतर निवृत्त होणाऱ्या कर्मचाऱ्यांना ही पारंपरिक सुवर्णमंडित चांदीची पदके मिळणार नाहीत. या निर्णयामुळे रेल्वेतील एका दीर्घकालीन परंपरेला पूर्णविराम मिळाला असून, पारदर्शकतेच्या दृष्टीने हा निर्णय महत्त्वाचा मानला जात आहे.
