Railway News : राजस्थानमधील प्रसिद्ध खाटूश्यामजी मंदिरात दर्शनासाठी जाणाऱ्या भाविकांची संख्या जळगाव जिल्ह्यातून सातत्याने वाढत असल्याच्या पार्श्वभूमीवर रेल्वे प्रशासनाने मोठा निर्णय घेतला आहे.
भुसावळसह जळगाव, धरणगाव आणि अमळनेर परिसरातील भाविकांच्या सोयीसाठी काकीनाडा–हिसार–काकीनाडा दरम्यान विशेष रेल्वे गाडी सुरू करण्यात येणार आहे. ही रेल्वे सेवा केवळ भाविकांसाठीच नव्हे, तर सामान्य प्रवाशांसाठीही अत्यंत उपयुक्त ठरणार आहे.
रेल्वे प्रशासनाने दिलेल्या माहितीनुसार, ०७७०५ क्रमांकाची काकीनाडा–हिसार विशेष गाडी १८ फेब्रुवारी ते २५ मार्च २०२६ या कालावधीत धावणार आहे.
तर ०७७०६ क्रमांकाची हिसार–काकीनाडा विशेष गाडी २२ फेब्रुवारी ते २९ मार्च २०२६ या कालावधीत धावेल. ठराविक दिवसांमध्ये ही सेवा उपलब्ध असल्याने भाविकांना आपले खाटूश्यामजी दर्शनाचे नियोजन करणे अधिक सुलभ होणार आहे.
जळगाव जिल्ह्यात भुसावळ जंक्शन, जळगाव जंक्शन, धरणगाव आणि अमळनेर या स्थानकांवर या विशेष रेल्वेला थांबा देण्यात आला आहे.
खाटूश्यामजीकडे जाणारी ही गाडी दर गुरुवारी सकाळी ८.४५ वाजता धरणगाव स्थानकावरून रवाना होणार आहे.
परतीच्या प्रवासात हीच गाडी दर मंगळवारी सकाळी ४.१८ वाजता धरणगाव स्थानकावर थांबणार आहे. त्यामुळे धरणगाव, अमळनेर तसेच परिसरातील भाविकांना थेट आणि सोयीस्कर रेल्वे सुविधा मिळणार आहे.
याआधी खाटूश्यामजी दर्शनासाठी जाणाऱ्या भाविकांना बसने प्रवास करावा लागत होता किंवा अनेक रेल्वे गाड्या बदलाव्या लागत होत्या.
मात्र या विशेष गाडीमुळे प्रवासाचा वेळ, खर्च आणि मानसिक-शारीरिक त्रास मोठ्या प्रमाणात कमी होणार आहे. विशेषतः ज्येष्ठ नागरिक, महिला आणि कुटुंबांसाठी ही सेवा अतिशय लाभदायक ठरणार आहे.
या अतिरिक्त रेल्वे सेवेबद्दल जळगाव लोकसभा मतदारसंघाच्या खासदार स्मिता वाघ यांनी समाधान व्यक्त केले आहे.
रेल्वेमंत्री अश्विनी वैष्णव यांचे त्यांनी आभार मानले असून, खान्देशातील भाविकांची दीर्घकालीन मागणी लक्षात घेऊन रेल्वे प्रशासनाने सकारात्मक निर्णय घेतल्याचे त्यांनी सांगितले.
या सेवेमुळे धार्मिक पर्यटनाला चालना मिळून स्थानिक अर्थव्यवस्थेलाही लाभ होईल, असा विश्वास व्यक्त करण्यात येत आहे.
