UPI News : देशभरात UPI वापरकर्त्यांची संख्या झपाट्याने वाढत असताना, अनेकदा खात्यात पुरेसा बॅलन्स नसल्यामुळे पेमेंट फेल होण्याचा अनुभव अनेकांनी घेतला आहे. मात्र आता ही अडचण दूर होणार आहे. नॅशनल पेमेंट्स कॉर्पोरेशन ऑफ इंडिया (NPCI) ने UPI वापरकर्त्यांसाठी एक नवं आणि अत्यंत उपयुक्त फीचर ‘UPI Now Pay Later’ लॉन्च केलं आहे. या सुविधेला UPI द्वारे प्री-अप्रूव्ड क्रेडिट लाइन असेही म्हटले जात आहे.
या नव्या फीचरमुळे UPI पेमेंट केवळ तुमच्या बँक खात्यातील शिल्लक रकमेवर अवलंबून राहणार नाही. खात्यात पैसे नसले तरी, गरज पडल्यास तुम्ही बँक किंवा लेंडरकडून मिळालेल्या प्री-अप्रूव्ड क्रेडिटचा वापर करून तात्काळ पेमेंट करू शकता. म्हणजेच UPI आता एक प्रकारे शॉर्ट-टर्म डिजिटल क्रेडिट टूल म्हणूनही काम करणार आहे.
UPI Now Pay Later म्हणजे काय?
ही एक डिजिटल क्रेडिट सुविधा आहे, ज्याअंतर्गत बँक किंवा वित्तीय संस्था ग्राहकाच्या प्रोफाइल आणि क्रेडिट स्कोअरच्या आधारे एक ठराविक क्रेडिट लिमिट मंजूर करते.
ही लिमिट साधारणतः २०,००० ते ५०,००० रुपयांपर्यंत असू शकते. या मर्यादेचा वापर करून ग्राहक UPI द्वारे थेट पेमेंट करू शकतो आणि ठराविक कालावधीनंतर वापरलेली रक्कम परतफेड करू शकतो.
हे फीचर कसं काम करतं?
UPI पेमेंट करताना यूजरला बँक खात्याऐवजी ‘क्रेडिट लाइन’ हा पर्याय निवडता येतो. पेमेंट तात्काळ पूर्ण होतं आणि वापरलेली रक्कम मंजूर क्रेडिट लिमिटमधून वजा केली जाते. बिलिंग सायकल पूर्ण झाल्यावर वापरलेल्या रकमेचं बिल तयार होतं, जे ठरलेल्या अटींनुसार भरावं लागतं.
या सुविधेचे फायदे
या फीचरचा सर्वात मोठा फायदा म्हणजे कमी बॅलन्स असतानाही पेमेंटमध्ये अडथळा येत नाही. UPI जिथे जिथे स्वीकारलं जातं, तिथे ही सुविधा वापरता येते. तसेच फ्लेक्सिबल रिपेमेंट पर्याय आणि पूर्णपणे डिजिटल प्रक्रिया असल्यामुळे कोणतीही कागदोपत्री झंझट नाही.
पात्रता काय आहे?
ही सुविधा वापरण्यासाठी ग्राहक भारतीय नागरिक असावा, वय किमान १८ वर्षे असावे, PAN आणि आधार मोबाइल नंबरशी लिंक असावेत, UPI सक्षम बँकेत सक्रिय खाते असावे आणि CIBIL स्कोअर 750 किंवा त्याहून अधिक असणे आवश्यक आहे.
एकूणच, ‘UPI Now Pay Later’ मुळे डिजिटल पेमेंट अधिक सोपं, वेगवान आणि लवचिक होणार असून, UPI वापरकर्त्यांसाठी ही एक मोठी दिलासादायक बातमी मानली जात आहे.
