Ahmednagar Weather Update : अहमदनगर शहरासह संपूर्ण जिल्ह्यात गेल्या काही दिवसांपासून वातावरणात सातत्याने चेंजेस पाहायला मिळत आहेत. खरेतर जिल्ह्यात जानेवारी आणि फेब्रुवारी महिन्यात थंडीच्या लाटेबरोबरच वादळी पावसाचे सावट पाहायला मिळाले होते. दरम्यान, आता उन्हाळ्यातही तशीच परिस्थिती पाहायला मिळत आहे. गेल्या मार्च महिन्यात जिल्ह्यातील काही भागांमध्ये अवकाळी पावसाची हजेरी लागली होती.
आता एप्रिल महिन्यातही असेच काहीसे घडतं आहे. जिल्ह्यात उष्णतेच्या लाटेबरोबरच वादळी पाऊस त्राहीमाम माजवत आहे. गेल्या मार्च महिन्यात नगर मधील तापमान 31 अंश सेल्सिअस पर्यंत पोहोचले होते.
दरम्यान, या चालू महिन्यात तापमानाने जवळपास 40°c चा टप्पा गाठला आहे. काल अर्थातच बुधवारी नगरमध्ये उच्चांकी 39.82 अंश सेल्सिअस तापमानाची नोंद करण्यात आली आहे. 46 दिवसांनंतर काल दुपारी या विक्रमी तापमानाची नोंद झाली.
दरम्यान दिवसभर उष्णतेचा तडाका कायम राहिल्यानंतर सायंकाळी नगर जिल्ह्यातील पाथर्डी आणि पारनेर तालुक्यात पावसाने हजेरी लावली आहे. या वादळी पावसामुळे काही काळ का होईना पण या भागातील उकाड्याने हैराण जनतेला थोडासा दिलासा मिळाला आहे.
मात्र हा वादळी पाऊस शेतकऱ्यांसाठी मोठा त्रासदायक ठरला आहे. पारनेर आणि पाथर्डी भागातील कांदा पिकाचे या वादळी पावसामुळे मोठे नुकसान झाले आहे. त्यामुळे आधीच बेजार झालेल्या शेतकऱ्यांना याचा मोठा फटका बसला आहे.
एकतर बाजारात कांद्याला अपेक्षित असा भाव मिळत नाहीये आणि अशातच आता वादळी पाऊस झाला आहे. त्यामुळे शेतकऱ्यांचे मोठे आर्थिक नुकसान झाले आहे. या पावसामुळे आणि वाऱ्यामुळे काल काही काळ शहरातील काही भागात वीजपुरवठा देखील खंडित झाला होता.
त्यामुळे शहरातील नागरिकांना मोठा त्रास सहन करावा लागला. दरम्यान आज अर्थातच गुरुवारी सुद्धा भारतीय हवामान खात्याने अहमदनगर शहरासह जिल्ह्यात वादळी पावसाची शक्यता वर्तवली आहे. यामुळे जिल्ह्यातील शेतकऱ्यांची चिंता वाढणार आहे.
आयएमडीने म्हटल्याप्रमाणे आज अहमदनगर, पुणे, रत्नागिरी, सिंधुदुर्ग, सातारा, कोल्हापूर, बीड, धाराशिव, लातूर, नांदेड, हिंगोली आणि परभणी जिल्ह्यात काही ठिकाणी हलक्या स्वरूपाच्या पावसाची शक्यता आहे.
याशिवाय आज मराठवाडा विभागातील जालना आणि छत्रपती संभाजी नगर जिल्ह्यातही हलक्या पावसाचा अंदाज देण्यात आला आहे. विशेष म्हणजे उद्या देखील राज्यातील काही भागांमध्ये पावसाचा अंदाज देण्यात आला आहे.
राज्यातील नाशिक, धुळे, नंदुरबार, नांदेड, यवतमाळ, वर्धा, चंद्रपूर, गडचिरोली तथा सोलापूर, धाराशिव, लातूर, छत्रपती संभाजीनगर, जळगाव या जिल्ह्यात हलक्या पावसाची शक्यता वर्तवण्यात आली आहे.
