अहमदनगर Live24 टीम, 2 मे 2021 :-भारत कोरोनाचा सर्वाधिक फटका बसलेला देश ठरत असताना पंतप्रधान नरेंद्र मोदींनी प्रचारसभा घेऊन चुकीचा संदेश दिला. याबद्दल त्यांच्यावर अनेक तज्ज्ञांनी टीका देखील केली आहे.
पण नुकत्याच झालेल्या निवडणुकांमध्ये भाजपाला करावा लागलेला पराभवाचा सामना हा या कोरोना काळात मोदींचा जनाधार कमी झाल्याचंच सूचित करत आहे, असे अमेरिकन वृत्तपत्र वॉशिंग्टन पोस्टने म्हटलं आहे.
पश्चिम बंगाल, तामिळनाडू, केरळ आणि आसाम ही चार राज्ये आणि पुद्दुचेरी या केंद्रशासित प्रदेशात झालेल्या मतदानाचे निकाल रविवारी समोर आले. यामध्ये पश्चिम बंगालमध्ये भाजपाला मोठा झटका बसला.
पश्चिम बंगालमध्ये भाजपाच्या जागा मोठ्या प्रमाणावर वाढल्या असल्या, तरी अब की बार २०० पार मात्र भाजपाला जमलेलं नाही.
पुन्हा एकदा ममता बॅनर्जी यांचच सरकार येणार असल्यामुळे भाजपाच्या अनेक दिग्गजांनी केलेला प्रचार पक्षाच्या कामी न आल्याचंच दिसून येत आहे.
त्यासोबतच मेट्रो मॅन इ. श्रीधरन यांना मुख्यमंत्रीपदाचा उमेदवार करण्याचा डावही भाजपाला केरळमध्ये विजय मिळवून देऊ शकला नाही. तर तामिळनाडूमध्येही भाजपाला फारशी प्रगती करता आलेली नाही.
त्यामुळे करोना काळात प्रचंड चर्चा आणि प्रचार झालेल्या निवडणुकांमध्ये भाजपाला आसाम आणि पुद्दुचेरी स्वत:कडेच राखण्यावर समाधान मानावं लागलं आहे. यावरून वॉशिंग्टन पोस्टमध्ये मोदींवर टीका करण्यात आली आहे.
देशाची कमजोर आरोग्य व्यवस्था कोरोनाच्या दुसऱ्या लाटेनं खिळखिळी केलेली असतानाच भारतात ४ राज्य आणि एक केंद्रशासित प्रदेशात निवडणुका घेण्यात आल्या. त्यावर बऱ्याच तज्ज्ञांनी आक्षेप घेतला आहे.
मद्रास उच्च न्यायालयाने देखील निवडणूक काळात झालेल्या रुग्णसंख्या विस्फोटाला निवडणूक आयोग जबाबदार असल्याची टिप्पणी केली होती, असे वॉशिंग्टन पोस्टने दिलेल्या वृत्तात म्हटलं आहे.
गेल्या महिन्याभरात पंतप्रधान नरेंद्र मोदींनी अनेक मोठमोठ्या प्रचारसभा घेतल्या. या प्रचारसभांना पश्चिम बंगालमधल्या हजारो, लाखो लोकांनी उपस्थिती लावली होती.
एक महिला नेतृत्व करत असलेल्या पक्षासोबत मोदींचा पक्ष असलेल्या भाजपाचा सामना होता. मोदी आणि त्यांचे गृहमंत्री अमित शाह यांनी पश्चिम बंगालमध्ये तब्बल ५० प्रचारसभा घेतल्या.
- ब्रेकींग बातम्यांसाठी आमचे टेलिग्राम चॅनेल जॉइन करा http://bit.ly/3qvXmDb
- अहमदनगर Live24 च्या ब्रेकिंग बातम्या मिळवण्यासाठी फॉलो करा : फेसबुक | ट्विटर|
