अहमदनगर Live24 टीम, 13 जून 2021 :- माका (ता. नेवासे) ग्रामपंचायतीचे सरपंच नाथाजी घुले यांच्यावरील अविश्वासाचा ठराव पुरेशा संख्याबळा अभावी फेटाळण्यात आल्याने सरपंच घुले यांचे पद अबाधित राहिले.
ठराव बारगळताच सरपंच समर्थकांनी जल्लोश केला. तेरापैकी ८ सदस्यांनी घुले यांना समर्थन दिले. माका ग्रामपंचायतीचे लोकनियुक्त सरपंच नाथाजी घुले यांच्या विराेधात अकरा सदस्यांनी नेवाशाचे तहसीलदार रुपेशकुमार सुराणा यांच्याकडे अविश्वास ठराव दाखल केला.
त्यानुसार माका ग्रामपंचायत कार्यालयात तहसीलदार सुराणा यांच्या उपस्थितीत अविश्वासाठी सदस्य बैठक बोलावण्यात आली होती. बैठकीस सदस्य आदिनाथ रामभाऊ मस्के, रमेश निवृत्ती कराळे, कमलबाई मुरलीधर लोंढे, सुशीलाबाई खंडेराव गुलगे, शोभाबाई गोरक्षनाथ घुले हे फक्त पाच सदस्य हजर राहिले.
सुदाम नामदेव घुले, देविदास जयवंत भुजबळ, सुमन अर्जुन घुले, आशाबाई दिगंबर शिंदे, उषाबाई सत्यवान पटेकर, दिगंबर तुकाराम आखाडे, वनिता दिगंबर फलके, जयश्री ज्ञानेदव सानप या आठ सदस्यांनी अनुपस्थित राहून सरपंच घुले यांना पाठिंबा दर्शवला.
त्यामुळे अविश्वास ठराव फेटाळला. यासाठी चांदेचे मंडलाधिकारी मिलिंद जाधव, तलाठी झेंडे यांनी काम पाहिले. अविश्वास ठराव नाट्यातून माका येथील राजकीय समिकरणे बदलली. सरपंच नाथाजी घुले यांचे तीन समर्थक सदस्य विरोधात गेले.
मात्र, विरोधातील सहा सदस्यांनी सरपंचाना मदत केली. सरपंच नाथाजी घुले यांचे विरोधक अनिल घुले हेही अंतिम टप्प्यात काकांच्या बाजूने उभे राहिले. सरपंचपदाच्या निवडणुकीत नाथाजी व अनिल घुले यांच्यात लढतीत नाथाजी विजयी झाले होते.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
