अहमदनगर लाईव्ह 24 टीम / पारनेर :- कृषी उत्पन्न बाजार समितीत रविवारी कांदा लिलाव घेण्यात आला. या वेळी नवीन कांद्यास सरासरी ६ हजार ते ९ हजार रुपये प्रती क्विंटल असा बाजारभाव मिळाला. बाजार समितीत जवळपास २६ हजार ७३२ कांदा गोण्या आवक झाली होती.
जिल्ह्यातील बाजार समित्यांमधील कांदा लिलावात आता कांद्याच्या दरात घसरण होताना दिसत आहे. गावरान कांदा आता शिल्लक नाही. त्यामुळे सध्या नवीन लाल कांद्याची आवक सुरू आहे. काही दिवसांपासून तेजीत असलेले कांद्याचे दर काही प्रमाणात कमी होत आहेत.
पारनेर बाजार समितीत कांदा आता नऊ हजारांपर्यंत आला आहे. रविवारी बाजार समितीत २६ हजार कांदा गोण्या आवक झाली होती. या वेळी एक नंबर नवीन कांद्यास प्रती क्विंटलला ९ हजार रुपयांपर्यंत बाजारभाव मिळाला.
तसेच दोन नंबर कांद्यास ४ हजार ५०० ते ५ हजार ९०० रुपये, तर तीन नंबर कांद्यास प्रती क्विंटल साडेचार हजार रुपयांपर्यंत भाव मिळाला. याआधी पारनेर बाजार समितीत नवीन कांद्यास ११ हजार रुपयांपर्यंत भाव मिळाला होता. आता मात्र या दरात काही प्रमाणात घसरण झाली आहे.
राहुरी कृषी उत्पन्न बाजार समितीत रविवारी ४ हजार ३७६ कांदा गोण्या आवक होती. या वेळी घेण्यात आलेल्या लिलावात एक नंबर कांद्यास सरासरी पाच हजार ते ७ हजार ५०० रुपये प्रती क्विंटल असा बाजारभाव मिळाला.
तसेच दोन नंबर कांद्यास ३ हजार ते ४ हजार ५०० रुपयांपर्यंत भाव मिळाला. किरकोळ बाजारपेठेत कांद्याच्या दरात तेजी आहे. सध्या ७० ते ८० रुपये किलो असा दर आहे.
