अहमदनगर Live24 टीम, 20 फेब्रुवारी 2022 :- श्रीगोंदे तालुक्यातील काष्टी वांगदरी रोडवर (लहारेपट) येथे राहणारे माजी सैनिक जालिंदर रामदास पाचपुते (वय ४८) यांच्या घराचा भर दुपारी दरवाजा तोडून चोरट्यानी घराच्या कपाटातील सुमारे पंधरा तोळे सोने व िपस्तूल चोरुन नेला.
भरदिवसा झालेल्या या चाेरीमुळे एकच खळबळ उडाली आहे. तालुक्यातील काष्टी( लहारेपट) येथे शुक्रवारी भर दुपारी साडेबारा ते एकच्या सुमारास सेवानिवृत्त माजी सैनिक जालिंदर पाचपुते हे गावचा आठवडे बाजार व शिवजयंती असल्यामुळे गावात बाजारला आले होते.
घरातील महिला शेतातील काम करण्यासाठी शेतावर गेल्या असताना घरी कोणी नसल्याचा गैरफायदा घेऊन चोरट्याने घराच्या दरवाजे व कुलपे कटावणीने तोडून कपाटातील पंधरा तोळे सोने व निवृत्तीनंतर स्वतःच्या संरक्षणासाठी घेतलेले पिस्तूल चोरीला गेल्याने गावात एकच खळबळ उडाली.
घटनेनंतर जालिंदर यांचे बंधू ग्रामपंचायत सदस्य मेजर चांगदेव पाचपुते यांनी पोलिसांना खबर दिली, घटनास्थळी पोलिस निरिक्षक रामराव ढिकले यांनी फौजफाट्यासह घटनास्थळी धाव घेऊन घटनेची पहाणी व पंचनामा करुन तपासाची चक्रे फिरवत खबऱ्या मार्फत तपास सुरु केला आहे.
आदिकचा तपास करण्यासाठी नगर येथून श्वानपथक बोलावून आरोपीचा माग काढण्याचा प्रयत्न केला. परंतु काष्टी वागंदरी रस्त्याच्या कडेला हे घर असल्याने रस्त्यावर जास्त वाहतूक असल्याने श्वानाला पुढे मार्ग दाखवता आला नाही.
श्रीगोंदे पोलिस ठाण्यात अज्ञात व्यक्तीच्या विरोधात गुन्हा दाखल झाला असुन पुढील तपास पोलिस निरिक्षक रामराव ढिकले यांच्या मार्गदर्शनाखाली सुरु आहे.
